تیز رفتاری انسانی زندگیوں پر بھاری پڑگئی۔ عید کے دوسرے روز ٹریفک حادثات میں مزید 20 افراد جاں بحق ہوگئے۔ دو روز میں تیز رفتاری 37 زندگیاں لے گئی۔ اسلام آباد میں ون وہیلرز کے خلاف کریک ڈاؤن جاری ہے۔ پولیس نے ڈیڑھ سو موٹرسائیکلیں تھانوں میں بند کر دیں۔ لاہورمیں نامعلوم گاڑی کی ٹکرسے 2 لڑکیاں جاں بحق، کبیر والا میں 3، کامونکی میں 2، سرگودھا، عارف والا میں 5 اموات ہوئیں، لوئر دیر میں گاڑی کھائی میں گرنے سے بچہ اور خاتون جانیں گنوا بیٹھے۔

ٹنڈو الہیار نصیر کینال میں تیز رفتار کار جاگری، 4 افراد جاں بحق

سندھ کے شہر ٹنڈو الہیار میں تیز رفتار کار نصیر کینال میں جاگری، حادثے کے نتیجے میں کار میں سوار 4 نوجوان جاں بحق ہوگئے۔

نوجوان کراچی کے علاقے نارتھ کراچی سیکٹر 11جے کے رہائشی ہیں، جاں بحق ہونے والوں نوجوانوں کی شناخت علی شان، عبدالحد، عدیل اور سمیر کے ناموں سے ہوئی ہے۔

لاہور موٹروے پر ٹریفک حادثے میں 2 لڑکیاں جاں بحق

لاہورکے قریب موٹر وے پر ٹریفک حادثے میں 2 لڑکیاں جاں بحق ہوگئیں۔ واقعہ ٹھوکر نیاز بیگ کے قریب پیش آیا۔ پولیس کے مطابق جاں بحق ہونے والی دونوں لڑکیوں کی عمریں 18 سے 20 سال کے لگ بھگ ہیں۔

دونوں لڑکیاں نامعلوم گاڑی کی ٹکر سے زخمی ہوئیں، اور اسپتال لے جاتے ہوئے دم توڑ گئیں۔ لڑکیوں کی شناخت نہیں ہوسکی۔ پولیس نے لاشیں جناح اسپتال منتقل کرکے تحقیقات کا آغازکر دیا ہے۔

قمبر شہداد کوٹ؛ 2 موٹر سائیکلوں میں تصادم، حادثے میں ماں بیٹی جاں بحق

متوفی عدیل اپنے دوستوں کے ساتھ اپنے رشتہ داروں سے ملنے میرپور خاص جا رہے تھے جبکہ چاروں نوجوانوں کی لاشوں کو کراچی منتقل کر دیا گیا۔

4 دوستوں میں سے 3 کی اجتماعی نماز جنازہ ادا

بعد ازاں ٹنڈوالہیار میں المناک ٹریفک حادثے میں جاں بحق ہونے والے 4 دوستوں میں سے 3 کی اجتماعی نماز جنازہ نارتھ کراچی الیون جے میں ادا کر دی گئی۔

جاں بحق ہونے والے علی شان، سمیر اور عبدالاحد کی نماز جنازہ میں لواحقین، عزیز و اقارب اور اہل محلہ کی بڑی تعداد نے شرکت کی۔

نماز جنازہ کے موقع پر رقت آمیز مناظر دیکھنے میں آئے جبکہ حادثے پر اہل خانہ اور دوست احباب نے شدید غم و افسوس کا اظہار کیا۔

اس موقع پر سمیر کے چچا کا کہنا تھا کہ سمیر مکینک کا کام کرتا اور بغیر اطلاع کے دوستوں کے ساتھ نکلا تھا۔

چاروں دوستوں کی سپر ہائی وے پر سفر کی ویڈیو منظرعام پر آگئی، چاروں دوستوں نے کراچی سے سپر ہائی وے پر سفر کرنے کے بعد حیدرآباد کے ہوٹل پر چائے اور کولڈ ڈرنک پی جبکہ ویڈیو میں دوستوں کو دوران سفر ہنسی مذاق کرتے ہوئے دیکھا جاسکتا ہے۔

کامونکی میں پولیس اہلکاروں کی موٹر سائیکل گدھا گاڑی سے ٹکراگئی، 2 اہلکار جاں بحق

پنجاب کے ضلع گجرانوالہ کے شہر کامونکی کے علاقے کوٹ بلال کے قریب پولیس اہلکاروں کی موٹر سائیکل تیز رفتاری کے باعث گدھا گاڑی سے ٹکرا گئی، حادثے میں 2 پولیس اہلکار جاں بحق اور 2 دوست زخمی ہوگئے۔

پولیس کے مطابق تھانہ تتلے عالی کے علاقہ کوٹ نثار شاہ کا کانسٹیبل حسن علی اور کنگر والی کا عثمان گادی جو کہ روات پولیس ٹریننگ سنٹر میں تعینات تھے اور عید منانے کے لئے گھر آئے ہوئے تھے، اپنے دوستوں طیب خان اور عثمان کے ہمراہ موٹر سائیکل پر گوجرانوالہ سے واپس آرہے تھے کہ کوٹ بلال کے قریب ان کی موٹر سائیکل گدھا گاڑی کے ساتھ ٹکرا گئی جس کے نتیجے میں کانسٹیبل عثمان اور حسن علی جاں بحق جبکہ دیگر 2 افراد شدید زخمی ہوگئے۔

جاں بحق اور زخمیوں کو اسپتال منتقل کردیا گیا، جبکہ پولیس نے ضروری کارروائی کے بعد پولیس اہلکاروں کی لاشیں ورثا کے حوالے کردی ہیں۔

خانیوال میں ٹریفک حادثے میں 3 افراد موقع پر جاں بحق

خانیوال کے علاقے کبیروالا میں مخدوم پور انٹر چینج کے قریب ٹریفک حادثے میں 3 افراد موقع پر جاں بحق ہو گئے۔

افسوسناک ٹریفک حادثہ خانیوال میں پیش آیا، جہاں کبیر والا میں مخدوم پور انٹر چینج کے قریب تیز رفتار دودھ وین نے موٹر سائیکل سوار کو کچل ڈالا، حادثے میں موٹر سائیکل سوار 2 خواتین اور بچہ جاں بحق ہوگیا۔

جاں بحق خواتین میں بشیراں بی بی، روبینہ بی بی اور معصوم بچہ شامل ہے۔

موٹر سائیکل ڈرائیور عدنان اور لاشوں کو تحصیل ہیڈ کوارٹر اسپتال منتقل کردیا گیا جبکہ واقعے کے بعد تیز رفتار دودھ کی وین ڈرائیور موقع سے فرار ہوگیا۔

ڈجکوٹ میں 2 موٹرسائیکلوں میں تصادم، 3 ماہ کی بچی جاں بحق

ڈجکوٹ کے علاقے میں 2 موٹرسائیکلوں میں تصادم کے نتیجے میں 3 ماہ کی بچی جاں بحق اور خاتون سمیت 3 افراد زخمی ہوگئے۔

ریسکیو اہلکاروں نے زخمیوں کو طبی امداد کے لیے الائیڈ اسپتال منتقل کر دیا جبکہ حادثے تیز رفتاری کے باعث پیش آیا۔

سرگودھا میں رکشے کی موٹر سائیکل کو ٹکر سے 2 افراد جاں بحق

رات گئے سرگودھا میں سلانوالی روڈ پر تیز ر فتار رکشے نے موٹر سائیکل کو ٹکر مار دی، حادثے میں 8 سالہ بچی سمیت 2 افراد جاں بحق اور 5 زخمی ہوگئے جبکہ لاشوں اور زخمیوں کو اسپتال منتقل کردیا گیا۔

اسلام آباد میں ٹیوٹا ہائی ایس ویگن اور کار آپس میں ٹکرا گئے، ایک شخص جاں بحق

دوسری جانب اسلام آباد میں کلب روڈ پر تیز رفتار گاڑیاں آپس میں ٹکرانے سے حادثہ پیش آیا ہے، جہاں ٹیوٹا ہائی ایس ویگن اور کار آپس میں ٹکرانے سے کار سوار شخص جاں بحق ہوگیا جبکہ 7 افراد زخمی ہوگئے۔

زخمیوں کو اسپتال منتقل کر دیا گیا، زخمیوں میں 6 ماہ کا بچہ بھی شامل ہے جبکہ تمام زخمیوں کو علاج کے لیے اسپتال میں منتقل کردیا گیا۔

اس کے علاوہ لاہور میں جناح انڈر پاس پر موٹر سائیکل کھمبے میں جا گھسی، جس کے نتیجے میں 2 نوجوان جان گنوا بیٹھے جبکہ رینالہ خورد میں گاڑی کی موٹر سائیکل کو ٹکر سے 2 خواتین سمیت 3 افراد جاں بحق ہوگئے۔

اسی طرح قمبر شہداد کوٹ، میر پور ساکرو، حافظ آباد میں موٹر سائیکلوں کی ٹکر کے باعث 8 جانیں لے گئی۔

ادھر خیبر پختونخوا کے علاقے لوئر دیر میں میدان چینار کوٹ کے مقام پر گاڑی کھائی میں گرگئی، حادثے میں 2 افراد جاں بحق جبکہ 12 زخمی ہوگئے، جاں بحق ہونے والوں میں ایک بچہ اور ایک خاتون شامل بھی شامل ہیں۔

ریسکیو ذرائع کے مطابق بدقسمت گاڑی کمبڑ سے تاران جار ہی تھی، زخمیوں میں بھی زیادہ تر بچے شامل ہیں، جنہیں ڈی ایچ کیو اسپتال منتقل کر دیا گیا۔

عید کے دوسرے روز کوہاٹ کی تحصیل لاچی میں موٹر سائیکل حادثے کا شکار ہوگئی۔ ریسکیو ذرائع کے مطابق حادثے کے نتیجے میں 2 افراد موقع پر جاں بحق ہوگئے۔