جمعیت علمائے اسلام (ف) کے سربراہ مولانا فضل الرحمان نے فلسطینیوں سے اظہار یکجہتی کے لیے لاہور، پشاور، کراچی اور کوئٹہ میں ملین مارچ کا اعلان کردیا اور کہا کہ حق چھینا گیا تو جے یو آئی صوبوں کے ساتھ کھڑی ہوگی، مائنز بل مسترد کرتے ہیں، بلوچستان میں ووٹ دینے والے جے یو آئی ارکان سے جواب طلب کرلیا ہے۔

اسلام آباد میں پریس کانفرنس کے دوران سربراہ جے یو آئی مولانا فضل الرحمان کا کہنا تھا کہ حکومت عوام کی جان و مال کی حفاظت میں ناکام دکھائی دے رہی، دھاندلی کے نتیجے میں قائم ہونے والی حکومتیں چاہے وفاق میں ہو یا صوبے میں، وہ عوام کے مسائل کے حل اور امن وامان کے قیام میں مکمل طور پر ناکام ہوچکی ہیں۔

انہوں نے کہا کہ2018 کے دھاندلی زدہ انتخابات کو قبول نہیں کیا، ہم نے 2018 کے انتخابات کو دھاندلی زدہ قرار دے کر مسترد کردیا تھا اور 2024 کے الیکشن پر بھی ہمارا وہی مؤقف ہے، ہم ان اسمبلیوں کو عوام کی نمائندہ اسمبلیاں نہیں کہہ سکتے، اس بات پر زور دے رہے ہیں، قوم کو شفاف اور غیر جانبدار انتخابات کی ضرورت ہے، حکومت بننے میں عوام کا کردار اہم ہے، یہاں پر مسلسل عوام کی رائے کو مسترد کیا جاتا ہے اور من مانی نتائج سامنے آتے ہیں اور سلیکٹڈ حکومتیں قوم پر مسلط کی جاتی ہیں، ہم نے فیصلہ کیا ہے کہ اہم اپنے پلیٹ فارم سے سیاسی جدوجہد جاری رکھیں گے۔

مولانا فضل الرحمان نے کہا کہ خیبرپختونخوا، بلوچستان اور سندھ میں بد امنی کی صورت حال نا قابل بیان ہے، مسلح گروہ دھندناتے پھر رہے ہیں عام لوگ بچوں کو اسکول نہیں بھیج سکتے، کاروباری طبقے سے منہ مانگے بھتے لیے جارہے ہیں، حکومت کی کارکردگی اس حوالے سے صفر ہے۔

صہیونی جارحیت کیخلاف فلسطنیوں کا ساتھ دینا مسلمانوں پرفرض ہے، مولانا فضل الرحمان

سربراہ جے یو آئی کا کہنا تھا کہ 11 مئی کو پشاور میں فلسطین کے حق میں مارچ ہوگا، 15 مئی کو کوئٹہ میں فلسطین کے حق میں مارچ ہوگا، پاکستانی قوم بساط کے مطابق مالی جہاد میں شریک ہوں، فلسطین سے حمایت برقرار ہے پاکستان میں لیڈنگ پوزیشن پر ہیں، کراچی میں فلسطین کے حق میں بہت بڑا ملین مارچ ہوا، 27 اپریل لاہور میں بہت بڑا ملین مارچ ہوگا، پنجاب کی عوام فلسطین کے حق میں آواز بلند کریں گئے۔

انہوں نے مزید کہا کہ جے یو آئی فلسطین کی آزادی کی حمایت جاری رکھے گی، اسرائیل ایک ناجائز ملک ہے اس کی حیثیت کاغذ کی ہے، ہزاروں چھوٹوں بچوں کو اسرائیل نے شہید کیا، 50 ہزار سے زائد پر امن شہریوں کو ظلم اور بربریت کا نشانہ بنایا گیا، اسرائیل جنگی مجرم ہے عالمی عدالت انصاف نے گرفتار کرنے کا حکم دیا، عدالت کا احترام نہ امریکا نہ یورپی ممالک کرتے ہیں، عالمی اداروں سب جنگی جرائم کی پست بنائی کر رہے ہیں۔

انہوں نے کہا کہ کیا کوئی ملک بے گناہ عورتوں اور بچوں کو شہید کرتا ہے، کیا کبھی ملک دفاعی طور پر بے گناہ شہریوں کو شہید کرتا ہے۔

ان کا کہنا تھا کہ اس وقت ملک میں خاص طور پر بلوچستان، خیبرپختونخوا اور سندھ میں بدامنی کی صورتحال ناقابل بیان ہے، کہیں پر بھی حکومتی رٹ نہیں ہے اور مسلح گروہ دنداتے پھر رہے ہیں اور عام لوگ نہ اپنے بچوں کو اسکول بھیج سکتے ہیں اور نہ مزدوری کرسکتے ہیں جب کہ کارباری طبقہ بھی پریشان ہے کہ ان سے منہ مانگے بھتے مانگے جارہے ہیں۔

مولانا فضل الرحمان نے کہا کہ ہماری حکومت کی کارکردگی اب تک زیرو ہے، وہ کسی قسم کا ریلیف دینے میں کامیاب نہیں ہوسکی ہے، ہماری جماعت اس مسئلے کو بھی اجاگر کررہی ہے، ہمارا یہ موقف ہے کہ حکومتی اور ریاستی ادارے عوام کے جان و مال کو تحفظ دینے میں ناکام ہوچکے ہیں۔

جے یو آئی نے 13 اپریل کو کراچی میں اسرائیل مردہ باد مظاہرے کا اعلان کردیا

جمعیت علمائے اسلام (ف) کے سربراہ نے کہا کہ اگر صوبوں کا حق چھینا جاتا ہے تو ہم صوبوں کے ساتھ کھڑے ہوں گے اور اپنے پلیٹ فارم سے میدان میں رہے گی، البتہ آئے روز کے معاملات میں کچھ مشترکہ امور سامنے آتے ہیں اس حوالے سے مذہبی جماعتوں یا پارلیمانی اپوزیشن جماعتوں کے ساتھ سے ملکر اشتراق عمل کی ضرورت ہو، اس کے لیے جمعیت کی شوریٰ حکمت عملی طے کرے گی۔

ان کا کہنا تھا کہ اپوزیشن کا اب تک کوئی باضابطہ کوئی موثر اتحاد موجود نہیں لیکن ہم باہمی رابطے کو برقرار رکھیں گے تاکہ کہیں پر بھی جوائنٹ ایکشن کی ضرورت پڑے تو اس کے لیے راستے کھلے ہیں اور فضا ہموار ہے۔