وفاقی دارالحکومت اسلام آباد میں تیز رفتار ڈمپر الٹنے سے کئی گاڑیاں نیچے دب گئیں، جس کے نتیجے میں 4 افراد جاں بحق اور 4 زخمی ہوگئے۔

پولیس کے مطابق اسلام آباد میں افسوسناک ٹریفک حادثہ آئی جے پی روڈ پر پیش آیا، حادثہ تیز رفتار ڈمپر کے ٹائر پھٹنے کی وجہ سے پیش آیا، ریت سے بھرا ڈمپر کنٹرول سے باہر ہونے پر گاڑیوں سے ٹکراتا ہوا ایک رکشے کے اوپرالٹ گیا۔

حادثے میں 4 افراد جاں بحق ہوئے، جن میں 3 مرد اور ایک 15 سالہ لڑکی شامل ہے، حادثے کی اطلاع ملتے ہی امدادی ادارے اور پولیس وہاں پہنچ گئے۔

حادثے کے بعد ڈمپر کا ڈائیور موقع سے فرار ہوگیا جبکہ لاشوں اور زخمیوں کو فوری طور پر اسپتال منتقل کردیا گیا۔

دوسری جانب اسلام آباد کے تھانہ سبزی منڈی کی حدود میں ٹریفک حادثے کے بعد ڈپٹی کمشنر (ڈی سی) اسلام آباد اور چیف ٹریفک آفیسر (سی ٹی او) موقع پر پہنچ گئے۔

کراچی: کار کی ٹکر سے موٹرسائیکل سوار میاں بیوی جاں بحق، ملزم نے افطاری کے وقت گانے چلا رکھے تھے، عینی شاہدین

کراچی: تیز رفتار ٹرالر نے پریکٹیکل دے کر واپس آنے والے 15 سالہ بچے کو کچل دیا

ترجمان کے مطابق حادثے میں مجموعی طور پر 4 افراد جاں بحق اور 4 زخمی ہوئے، جاں بحق افراد میں 3 مرد اور ایک لڑکی شامل ہے، حادثہ اس وقت پیش آیا جب ریت سے بھرا ڈمپر ٹائر پھٹنے کے باعث بے قابو ہو کر رکشے پر جا گرا، جس کے نتیجے میں رکشے میں سوار مسافر ڈمپر کے نیچے دب گئے جبکہ واقعے میں زخمی ہونے والے افراد کو فوری طور پر قریبی اسپتال منتقل کردیا گیا ہے۔

ڈی سی اسلام آباد کے مطابق فرار ہونے والے ڈمپر ڈرائیور کو جلد گرفتار کرلیا جائے گا جبکہ سی ٹی او نے بتایا کہ ڈمپر کو ہٹا کر ٹریفک کی روانی بحال کی جا رہی ہے۔

اس افسوسناک حادثے پر شہریوں نے افسوس کا اظہار کرتے ہوئے متعلقہ حکام سے سڑکوں پر ہیوی ٹریفک کے لیے مزید سخت حفاظتی اقدامات کرنے کا مطالبہ کیا ہے۔