پاکستان تحریک انصاف (پی ٹی آئی) کے بانی چیئرمین عمران خان اور ان کی اہلیہ بشریٰ بی بی سے اڈیالہ جیل میں آج ملاقات کا دن تھا، تاہم، آج عمران خان کی فیملی کو ملاقات کی اجازت تو نہ مل سکی، لیکن بشریٰ بی بی کے اہل خانہ کی ملاقات کرادی گئی، جبکہ بابر اعوان کو ملاقات کی اجازت ملنے پر اڈیالہ جیل کے گیٹ پر تنازع کھڑا ہوگیا۔

راولپنڈی اڈیالہ جیل میں سابق وزیراعظم عمران خان اور ان کی اہلیہ بشریٰ بی بی سے ملاقات کے موقع پر قانونی ٹیم اور جیل انتظامیہ کے درمیان کشیدگی اس وقت پیدا ہوئی جب بابر اعوان کو ملاقات کی اجازت ملنے پر گیٹ پر اختلافات دیکھنے میں آئے۔

سلمان اکرم راجہ نے جیل عملے سے مکالمہ کرتے ہوئے کہا کہ آپ ڈسپلن قائم کریں، بابر اعوان کا نام ہماری لسٹ میں شامل نہیں ہے۔

پی ٹی آئی کے سیکرٹری جنرل نے اعتراض اٹھایا کہ آپ نے بابر اعوان کو اندر کیوں بلایا اور ان کی گاڑی بھی جیل گیٹ سے اندر منگوائی گئی؟ ہم نے جو نام دیے ہیں، صرف انہی کو ملاقات کے لیے بھیجا جائے۔

اسلام آباد ہائیکورٹ نے بانی پی ٹی آئی سے ہفتے میں 2 دن کی ملاقات بحال کر دی

سلمان اکرم راجہ کا جیل انتظامیہ کو کہنا تھا کہ بشریٰ بی بی کی جانب سے سلمان صفدر اور عثمان گل کے نام شامل کرلیں، تمام معاملہ کل اسلام آباد ہائیکورٹ میں طے ہو چکا ہے، اعظم سواتی، حامد خان، عزیز بھنڈاری کے نام بھی شامل کریں، ہم نے جو 6 نام دیے ان کو ہی ملاقات کی اجازت دیں۔

بعدازاں، جیل انتظامیہ کی جانب سے بابر اعوان، نیاز اللّٰہ نیازی، سلمان اکرم راجہ کو ملاقات کی اجازت مل گئی جبکہ ان کے علاوہ ظہیر عباس چوہدری، نعیم حیدر پنجوتھا اور سلمان صفدر کو بھی ملاقات کرنے کی اجازت مل گئی۔

جیل عملے کا کہنا تھا کہ ہم نے تمام رہنماؤں کے نام فراہم کر دیے تھے اور جن کو اجازت دی گئی ہے ان کے ناموں سے بھی آگاہ کردیا گیا تھا تاہم ملاقاتوں کے دوران پیدا ہونے والے تنازعات نے صورتحال کو مزید پیچیدہ بنا دیا۔

بہنوں کی عمران خان ملاقات نہ کرانے پر توہین عدالت کی درخواست دائر کریں گے، سلمان اکرم راجہ

اڈیالہ جیل میں سلمان اکرم راجہ، نیاز اللہ نیازی اور دیگر وکلا کی بانی پی ٹی آئی عمران خان سے ملاقات ختم ہوئی تو صحافیوں سے غیر رسمی گفتگو کرتے ہوئے سلمان اکرم راجہ نے کہا کہ ہماری عمران خان سے ملاقات ہوئی ہے، ان کی بہنوں کو ملاقات کی اجازت نہیں ملی، بہنوں کی ملاقات نہ کرانے پر توہین عدالت کی درخواست دائر کریں گے۔

سلمان اکرم راجہ نے کہا کہ عمران خان کو ملاقاتوں کے حوالے سے عدالتی کارروائی سے متعلق آگاہ کیا ہے، ان کو بتایا ملاقات ضروری ہے میڈیا سے گفتگو کہیں بھی ہوسکتی ہے، انہوں نے میرے مؤقف کی تائید کی ہے۔

ان کا مزید کہنا تھا کہ جیل میں کچھ ملاقاتیں اوپر سے کرائی جارہی ہیں، عمران خان کو بتایا ہے اس سے پارٹی ڈسپلن خراب ہوتا ہے۔

عمران خان سے ہماری ملاقات نہیں کروائی گئی، علیمہ خان

اس موقع پر سابق وزیراعظم عمران خان کی بہن علیمہ خان نے غیر رسمی گفتگو کرتے ہوئے کہا کہ بانی پی ٹی آئی عمران خان سے ہماری ملاقات نہیں کروائی گئی، ڈھائی گھنٹے اندر بٹھا کر رکھا لیکن ملنے نہیں دیا۔