پاکستان تحریک انصاف (پی ٹی آئی) کے گزشتہ برس 24 اور 26 نومبر کے احتجاج کے دوران زخمی اور جاں بحق ہونے والے کارکنان کی تفصیلات کے حصول کے لیے اسلام آباد ہائیکورٹ میں درخواست دائر کر دی گئی۔

پی ٹی آئی کے وکیل انصر محمود کیانی کی جانب سے اسلام آباد ہائیکورٹ میں جمع کرائی گئی درخواست میں مؤقف اختیار کیا گیا کہ پی ٹی آئی کارکنوں نے 24 نومبر کو اپنے جمہوری حقوق کے لیے پرامن احتجاج کیا، احتجاج کرنے والوں پر حملہ کیا گیا جس کے نتیجے میں 26 نمبر چونگی سے ڈی چوک تک متعدد کارکن جاں بحق اور زخمی ہوئے۔

درخواست میں کہا گیا کہ گولیوں سے زخمی اور جاں بحق ہونے والوں کا اسپتالوں میں علاج اور پوسٹ مارٹم کیا گیا، جاں بحق اور زخمی ہونے والے کارکنوں کی معلومات کے لیے متعدد درخواستیں دیں لیکن معلومات فراہم نہ کی گئیں۔

عدالت سے استدعا ہے کہ وہ فریقین کو پی ٹی آئی کے زخمی اور جاں بحق کارکنان معلومات فراہم کرنے کے احکامات جاری کرے، پوسٹ مارٹم اور میڈیکو لیگل رپورٹ فراہم کرنے کا بھی حکم دیا جائے۔

درخواست میں وزارت داخلہ، ای ڈی پمز، پولی کلینک اور سی ڈی اے اسپتال کے ایم ایس سمیت ڈی جی سیف سٹی کو بھی فریق بنایا گیا ہے۔