وزیر اطلاعات پنجاب عظمیٰ بخاری نے شرجیل میمن کی پریس کانفرنس پر ردعمل دیتے ہوئے کہا کہ آئینہ ان کو دکھایا تو برا مان گئے، صوبائیت کارڈ کھیلنا آپکی پرانی عادت ہے جبکہ سندھ میں تمام بڑے پروجیکٹ وفاق کی مدد سے چل رہے ہیں۔

عظمیٰ بخاری کا کہنا ہے کہ سندھ میں تمام بڑے پروجیکٹ وفاق کی مدد سے چل رہے ہیں، جو جماعت 16 سال سے کراچی کا کچرا نہیں اٹھا سکی وہ ہمیں لیکچر نہ دے۔

سیہون حادثے پر پنجاب حکومت نے سیاست کرنے کی کوشش کی، شرجیل میمن

انہوں نے کہا کہ مسلسل شعلہ انگیزیاں آپ اور آپ کے لوگ کر رہے ہیں، ہمیں تو کبھی کبھی جواب دینا پڑ جاتا ہے تو آپ خفا ہوجاتے ہیں۔

عظمیٰ بخاری نے کہا کہ آپ کہتے ہیں ہم نے کبھی سیاست نہیں کی، لیکن کیا ہر معاملے میں چچا بھتیجی کا ذکر کرنا سیاست نہیں ہے؟

ان کا کہنا تھا کہ ہماری مجبوری ہے کھل کر آپ کو جواب بھی نہیں دے سکتے، ورنہ سندھ کے بلدیاتی الیکشن سے لیکر بہت ساری کہانیاں ہمارے پاس بھی ہیں۔

ڈمپرز روزانہ کراچی کے شہریوں کو مار رہے ہیں کیا وہ بھی وفاق کا مسئلہ ہے؟ عظمی بخاری

وزیر اطلاعات نے کہا کہ پنجاب میں کوئی منصوبہ ایک سال میں مکمل ہوجائے تو آپ تڑپ جاتے ہیں، سندھ میں جانور بندھے اسکول اور ٹرانسپورٹ کا رونا لوگ سالوں سے رو رہے ہیں۔

انہوں نے کہا کہ اپنی 16 سال اور مریم نواز کی ایک سال کی کارکردگی کا جب دل چاہے معائنہ کرلیں، آپ کو صفائی اور خوبصورت سڑکیں دیکھنے کا شوق ہو تو لاہور لازمی چکر لگائیں۔

عظمیٰ بخاری کا بیرسٹر سیف کے بیان پر ردعمل سامنے آگیا

قبل ازیں وزیر اطلاعات سندھ شرجیل انعام میمن نے کہا ہے کہ سیہون حادثے پر پنجاب حکومت نے سیاست کرنے کی کوشش کی، وفاق میں سب سے زیادہ حکومت مسلم لیگ ن کی رہی ہے۔

انہوں نے کہا کہ اگر سڑکیں مکمل نہیں ہوئے تو یہ ن لیگ کی وفاقی حکومت کی نااہلی ہے، پنجاب کی وزیر اطلاعات جب شعلہ بیانی کرتی ہیں تو یہ سمجھ لیں کہ جواب بھی آئے گا، ہم جھوٹی باتیں نہیں کریں گے، ہم صرف آپ کو سچ بتائیں گے۔