وزیرِ اطلاعات پنجاب عظمیٰ بخاری نے سندھ حکومت کے ترجمانوں کے بیانات پر ردعمل میں کہا ہے کہ ڈمپرز روزانہ کراچی کے شہریوں کو مار رہے ہیں کیا وہ بھی وفاق کا مسئلہ ہے؟

عظمیٰ بخاری نے کہا ہے کہ سندھ کے علاقے میں حادثے کو وفاق پر مت ڈالا جائے، پچھلے 16 سال سے سندھ پر حکومت پیپلز پارٹی کی ہے ن لیگ کی نہیں، کارکردگی اچھی ہوتو کام بولتا جیسے مریم نواز کا کام بول رہا ہے۔

انہوں نے کہا کہ اللّٰہ کرے سندھ نے جو 956 ارب کا ترقیاتی بجٹ منظور کیا ہے وہ جلد از جلد لگ جائے، مالی سال ختم ہونے والا ہے، وزیراعلیٰ سندھ اپنے علاقے کی گلیاں نہیں بناسکے۔

وزیرِ اطلاعات نے کہا کہ وزیراعلیٰ سندھ اب تک سڑکیں اور ہائی وے بھی نہیں بنا سکے، وفاق سے ہر سال معمول کے مطابق سندھ کو اس کے حصے کے فنڈز ملتے ہیں، اگر سندھ ان اربوں روپے کے فنڈز سے بھی اپنی سڑکیں نہیں بنا سکتا تو پھر آپ کا اللّٰہ حافظ ہے۔

لیگی رہنما نے کہا کہ پنجاب حکومت کے 90 فیصد منصوبے اپنے فنڈ سے مکمل ہو رہے ہیں، وفاق اور صوبوں کے معاملات میں چچا بھتیجی کے رشتے کا کیا تعلق، اس کا حوالہ کیوں؟ مریم نواز پنجاب میں اپنے صوبے کے وسائل سے درجنوں بڑی سڑکیں مکمل کرچکی ہیں۔

عظمیٰ بخاری کا کہنا تھا کہ وزیراعلی سندھ اپنے نئے 100 ترجمانوں کو گراؤنڈ رائیلٹی پر بریفننگ بھی دیں، ناتجربہ کار ترجمانوں کو جو جھوٹی سچی پرچیاں دی جاتی وہ وہی بول دیتے، جب کارکردگی اور کام بولتے ہوں تو ترجمانوں کا لاؤ لشکر رکھنے کی ضرورت نہیں پڑتی ہے۔

اس سے قبل ترجمان حکومت سندھ ارسلان شیخ نے کہا تھا کہ وزیراعظم اپنا نظام درست کریں، پیپلزپارٹی عوام کے ساتھ زیادتی پرچپ نہیں بیٹھے گی، بجلی کے بلوں پر لوگ خودکشیاں کر رہے ہیں، کے الیکٹرک ایکسٹرا فیول چارجز لگائے جا رہا ہے۔

ترجمان سندھ حکومت اور میئر سکھر ارسلان شیخ نے کہا ہے کہ سندھ میں حادثات کی بڑی وجہ این ایچ اے کی تباہ حال سڑکیں ہیں، وفاق نے شاید سندھ کو اپنے نقشے سے الگ کیا ہوا ہے۔