جنوبی افریقا کے خلاف پہلے ٹیسٹ میچ کے لیے پاکستان کی فائنل الیون کا اعلان کردیا گیا، آؤٹ آف فارم عبداللہ شفیق پلینگ الیون میں جگہ بنانے میں ناکام رہے۔

تفصیلات کے مطابق پاکستان کرکٹ بورڈ (پی سی بی) نے جنوبی افریقا کے خلاف پہلے ٹیسٹ کے لیے پلیئنگ الیون کا اعلان کردیا۔

پاکستان نے 4 فاسٹ بولرز کے ساتھ میدان میں اترنے کا فیصلہ کیا ہے، عامر جمال، نسیم شاہ، خرم شہزاد اور محمد عباس فاسٹ بولرز ہوں گے جبکہ عبد اللہ شفیق کو ناقص پرفارمنس کے باعث ڈراپ کر دیا گیا۔

تجربہ کار فاسٹ بولر محمد عباس کی پلیئنگ الیون میں واپسی ہوئی ہے جنہوں نے آخری بار پاکستان کے لیے اگست 2021 میں ویسٹ انڈیز کے خلاف ٹیسٹ کھیلا تھا۔

محمد عباس نے اس سیزن میں قائداعظم ٹرافی کے پانچ میچوں میں 31 وکٹوں کی عمدہ پرفارمنس کی وجہ سے ٹیسٹ اسکواڈ میں جگہ بنائی ہے۔

کپتان شان مسعود اور صائم ایوب اوپنننگ کریں گے، اس کے علاوہ بابر اعظم، کامران غلام، محمد رضوان، سعود شکیل اور سلمان علی آغا پلینگ الیون میں شامل ہیں۔

پاکستان اور جنوبی افریقا کے درمیان 2 میچوں پر مشتمل سیریز کا پہلا ٹیسٹ میچ کل بروز (جمعرات) سے سنچورین میں شروع ہورہا ہے۔

دوسری جانب جنوبی افریقا کی ٹیم کی اوپننگ کمبی نیشن میں کوئی تبدیلی نہیں کی گئی اور ٹونی ڈی زورزی اور ایڈن مارکرم ٹاپ پر برقرار رہیں گے جبکہ سری لنکا کے خلاف سیریز میں ان دونوں کی شاندار کارکردگی تھی اور وہ اس سے بھی بہتر کارکردگی کے ساتھ سامنے آنا چاہتے ہیں۔

سری لنکا سیریز سے جنوبی افریقا کی بیٹنگ لائن اپ بدستور برقرار ہے، جس میں قابل اعتماد ٹاپ 7 شامل ہیں۔

کاگیسو ربادا اور مارکو جانسن ٹیم کے 2 فرنٹ لائن پیسر ہوں گے جبکہ ڈین پیٹرسن تیسرے فاسٹ بولر ہوں گے، اس کے علاوہ کیشو مہاراج کی غیرموجودگی میں کوربن بوش کو ٹیم میں جگہ دی گئی ہے۔

بابر اعظم کو ٹیسٹ ٹیم میں شامل کرنے کیلئے کپتان شان مسعود کیا کرنے والے ہیں؟

خیال رہے کہ پاکستان اور جنوبی افریقا کے درمیان 2 ٹیسٹ میچوں کی سیریز کل سے شروع ہورہی ہے، جس کا پہلا ٹیسٹ سنچورین کے سپر اسپورٹس پارک میں کھیلا جانے والا باکسنگ ڈے ٹیسٹ میچ ہوگا جبکہ دوسرا ٹیسٹ 3 جنوری سے کیپ ٹاؤن میں کھیلا جائے گا۔

پاکستان ٹیم کو جنوبی افریقا کے اس دورے میں ٹی 20 سیریز میں دو صفر سے شکست ہوئی تھی لیکن اس نے ون ڈے سیریز میں جنوبی افریقا کی سرزمین پر تین صفر کا تاریخی وائٹ واش کیا جس کے بعد توقع کی جارہی ہے کہ آئی سی سی ورلڈ ٹیسٹ چیمپئن شپ کی یہ سیریز بھی دلچسپ اور سخت ہوگی۔

پاکستان ٹیم نے اپنی آخری ٹیسٹ سیریز شان مسعود کی قیادت میں انگلینڈ کے خلاف دو ایک سے جیتی ہے۔

پاکستان کے ٹیسٹ اسکواڈ میں شان مسعود، سعود شکیل، عامر جمال، عبداللہ شفیق، بابر اعظم، حسیب اللہ (وکٹ کیپر) کامران غلام، خرم شہزاد، میر حمزہ، محمد عباس، محمد رضوان (وکٹ کیپر ) نسیم شاہ، نعمان علی، صائم ایوب اور سلمان علی آغا شامل ہیں۔