سپریم کورٹ کے آئینی بینچ نے صدارتی امیدوار اصغر علی مبارک کے کاغذات نامزدگی مسترد ہونے کے خلاف درخواست کو 20 ہزار جرمانے کے ساتھ خارج کردیا۔

جسٹس امین الدین خان کی سربراہی میں سپریم کورٹ کے 6 رکنی آئینی بینچ نے صدارتی امیدوار اصغر علی مبارک کے کاغذات نامزدگی مسترد ہونے کے خلاف کیس کی سماعت کی۔

جسٹس جمال مندوخیل نے ریمارکس دیے کہ 184 تین کے تحت آپ نے درخواست دائر کی اس میں کون سا عوامی مفاد کا معاملہ ہے؟

جسٹس محمد علی مظہر نے کہا کہ آپ نے ہائیکورٹ سے کیوں نہیں رجوع کیا۔ جسٹس امین الدین خان کا کہنا تھا کہ اب تو درخواست ویسے بھی غیر مؤثر ہو چکی ہے۔

بعدازاں سپریم کورٹ نے درخواست گزار اصغر علی مبارک کی درخواست جرمانے کے ساتھ خارج کردی جبکہ عدالت نے جرمانے کی رقم قومی خزانے میں جمع کرانے کے بعد رسید بھی پیش کرنے کا حکم دے دیا۔