ایک طرف قبائل کے درمیان جھڑپیں گیارہویں روز بھی جاری رہیں اور مزید 6 جانیں چلی گئیں، گورنر خیبرپختونخوا فیصل کریم کنڈی صوبے کی سیاسی قیادت کے ہمراہ کرم ایجنسی کی صورت حال پر کوہاٹ میں جرگہ کے لیے پہنچے۔ تو دوسری جانب ضلعی انتظامیہ نے دعویٰ کیا ہے کہ ضلع کرم کے تمام مقامات پر حالات معمول پر آگئے ہیں۔

حالات معمول پر آگئے، ضلعی انتظامیہ

ڈپٹی کمشنر (ڈی سی) جاوید اللہ محسود نے بتایا ہے کہ متحارب قبائل کے درمیان فائر بندی پر اتفاق کے بعد مورچوں سے مسلح قبائل کو ہٹا کر وہاں فورسز اور پولیس کے دستے تعینات کردیے گئے ہیں۔

ڈپٹی کمشنر نے کہا کہ اب راستے کھولنے اور امن معاہدے کے لیے جرگہ ممبران عمائدین سے بات چیت کریں گے۔ کوہاٹ ڈویژن کے عمائدین اور پارلیمنٹرینز امن معاہدے کے لیے ضلع کرم آئیں گے۔

ضلعی انتظامیہ کا کہنا ہے کہ ضلع کرم کے تمام مقامات پر حالات معمول پر آگئے ہیں۔

سیاسی اختلافات اپنی جگہ لیکن قیام امن کی کوششوں میں ہم سب ایک ہیں، گورنر خیبرپختونخوا

کمشنر ہاؤس کوہاٹ میں منعقدہ جرگے میں شہدائے کرم کی مغفرت اور زخمیوں کی جلد صحت یابی کی دعا کی گئی۔

گورنر خیبرپختونخوا فیصل کریم کنڈی نے جرگے سے خطاب کرتے ہوئے کہا کہ جرگے میں آنے پر سیاسی قائدین اور مشران کا مشکور ہوں۔

فیصل کریم کنڈی نے کہا کہ امن وامان کے لیے ہر ایک کو اپنا کردار ادا کرنا ہوگا، سیاسی اختلافات اپنی جگہ، لیکن قیام امن کی کوششوں میں ہم سب ایک ہیں۔

گورنر خیبرپختونخوا نے کہا کہ پانچ دسمبر کو آل پارٹیز کانفرنس بلا رکھی ہے، اس اے پی سی میں کرم کی صورتحال پر غور ہوگا۔

ان کا کہنا تھا کہ کسی بھی مسئلے کا پہلا حل مذاکرات ہیں۔

گورنر فیصل کریم کنڈی نے جرگے کے بعد میڈیا سے گفتگو میں کہا کہ علی امین گنڈاپور انتشاری بیان بازی کی بجائے امن میں کردار ادا کریں، اے پی سی ایک عام شہری بھی بلا سکتا ہے۔

گورنر خیبرپختونخوا نے کہا کہ کرم اور صوبے کے امن کے لیے ہر حد تک جائیں گے، علی امین خود اسلام آباد پر حملہ آور ہوا لیکن اس کو کرم کی پروا نہیں ہے۔

انہوں نے کہا کہ علی امین ہمارا شکریہ ادا کریں کہ ان کا کام ہم کر رہے ہیں، امن کی خاطر وزیر اعلیٰ کی ہر بات برداشت کر لیں گے۔

ان کا کہنا تھا کہ گرینڈ جرگہ جلد کرم جائے گا، امن و امان کی ذمہ داری صوبائی حکومت کی ہوتی ہے، صوبائی حکومت ضلع کرم پر خصوصی توجہ دے، وزیر اعلیٰ اپنے صوبے کی فکر کرے۔

گورنر خیبرپختونخوا کے ہمراہ سیاسی قائدین کا قافلہ بھی گورنر ہاؤس پشاور سے کوہاٹ پہنچا، جرگہ وفد میں مسلم لیگ کے صوبائی صدر وفاقی وزیر امیر مقام ، اے این پی کے میاں افتخار حسین شامل ہیں۔

جرگے میں قومی وطن پارٹی کے سکندر شیرپاؤ ، جے یو آئی (س) کے حافظ عبدالرافع بھی شامل ہیں، وفد میں جے ہو آئی (س)، جماعت اسلامی، شیعہ علمائے کونسل، مسلم لیگ ق اور نیشنل ڈیموکریٹک موومنٹ کے رہنما موجود ہیں۔

سیاسی قائدین کے گورنر ہاؤس آمد پر فیصل کریم کنڈی نے دیگر سیایس جماعتوں کے ہمراہ ان کا خیر مقدم کیا۔

سب کو ایک پیج پر آنا ہوگا، امیر مقام

وفاقی وزیر انجینئر امیر مقام نے جرگے سے خطاب میں کہا کہ صوبے میں امن کیلئے ہم سب کو ایک پیج پر آنا ہوگا، خیبرپختونخوا حکومت کو کرم کی صورتحال پر توجہ دینی چاہیے۔

انہوں نے کہا کہ ہم امن وامان کے قیام کیلئے صوبائی حکومت کے ساتھ بیٹھنے کو تیار ہیں، لوگ ملک میں امن وامان چاہتے ہیں، لوگ ملک میں بدامنی کا خاتمہ چاہتے ہیں۔

کرم میں قبائلی جھڑپوں کے 11ویں روز مزید 6 افراد جاں بحق

ضلع کرم میں قبائل کے درمیان جنگ بندی معاہدے کے باوجود جھڑپوں کا سلسلہ جاری ہے، فائرنگ کے واقعات میں مزید 6 افراد جاں بحق اور 8 زخمی ہو گئے، جس کے بعد اموات کی تعداد 130 تک پہنچ گئی۔

ضلع کرم میں 21 نومبر کو ایک مسافر قافلے پر حملے کے نتیجے میں 45 افراد کی ہلاکت کے بعد 22 نومبر سے ضلع کرم کے مختلف جگہوں میں شروع ہونے والی جھڑپیں آج 11 ویں روز بھی جاری ہیں۔

پولیس کے مطابق جھڑپوں میں مزید 6 افراد جاں بحق اور 8 زخمی ہوگئے جس کے بعد اب ضلع کرم میں فائرنگ کے واقعات میں مرنے والے افراد کی تعداد 130 ہوگئی جبکہ 186 افراد زخمی ہوچکے ہیں۔

قبائلی جھڑپوں کے باعث پشاور پاراچنار مرکزی شاہراہ سمیت آمدورفت کے دیگر راستے بھی بند ہیں، مرکزی شاہراہ اور پاک افغان خرلاچی بارڈر پر آمدورفت بھی معطل ہے جبکہ شاہراہوں کی بندش سے تیل، اشیائے خورونوش اور ادویات کی شدید قلت پیدا ہو گئی ہے۔

کرم: جھڑپوں میں 50 افراد کی ہلاکت اور 120 افراد زخمی ہونے کے بعد قبائل کے درمیان سیز فائر

ڈپٹی کمشنر جاوید اللّٰہ محسود کا کہنا ہے کہ لوئر کرم کے مختلف مقامات پر پولیس اور سیکیورٹی فورسز کے دستے تعینات ہیں، باقی علاقوں میں بھی آج فائر بندی کی بھرپور کوشش کی جائے گی۔