اسلام آباد ہائیکورٹ نے سوشل میڈیا ایکٹیوسٹ اظہر مشوانی کے دونوں لاپتہ بھائیوں کو بازیاب کرا کر عدالت پیش کرنے کا حکم دے دیا۔

اسلام آباد ہائیکورٹ کے جسٹس میاں گل حسن اورنگزیب نے اظہر مشوانی کے 2 لاپتہ بھائیوں کی بازیابی کے لیے دائر درخواست سماعت کی۔

اظہر مشوانی کے بھائی پروفیسر مظہر الحسن اور پروفیسر ظہور الحسن چھ جون سے لاپتہ ہیں، دونوں لاپتہ بھائیوں کے والد کی طرف سے وکیل بابر اعوان عدالت کے سامنے پیش ہوئے۔

جسٹس میاں گل حسن اورنگزیب نے استفسار کیا کہ آج اخبار میں ہے، کیا یہ گرفتار ہیں؟ جس پر وکیل بابر اعوان نے بتایا کہ پٹشنر گرفتار نہیں ہے بلکہ یہ 2 لاپتہ بھائیوں کے والد ہیں، اس پر جسٹس میاں گل حسن اورنگزیب نے کہا کہ ٹھیک ہے وہ اور ہے جو گرفتار ہوا ہے۔

اظہر مشوانی کے بھائیوں کی بازیابی: ”اگر پولیس رپورٹ بدلتی ہے تو پھر دیکھتے ہیں“، عدالت

وکیل بابر اعوان نے کہا کہ اظہر مشوانی سوشل میڈیا ایکٹیوسٹ ہیں پہلے ان کو بھی اٹھایا گیا تھا، 2 پروفیسر بھائی 6 جون کو اٹھائے گئے جبکہ 5 جون کو رؤف حسن اور بیرسٹر گوہر کو بھی گرفتار کیا گیا، گوہر کو گرفتار نہیں کیا گیا رؤف حسن کو گرفتارکر لیا گیا۔

جج نے مسکراتے ہوئے ریمارکس دیے کہ گوہر گرفتار ہونا چاہتا تھا لیکن اسے گرفتار نہیں کیا گیا کیونکہ وہ کوالیفکیشن پر ابھی پورے نہیں اترتے۔

بابر اعوان نے کہا کہ لاہور ہائیکورٹ میں ہم نے پہلے پٹیشن دائر کی جو 5 اگست کو واپس لے لی، اسلام آباد سے خفیہ ادارے کا واٹس ایپ آیا جو ریکارڈ پر لگایا ہے، میسج میں کہا گیا کہ سوشل میڈیا ایکٹیویٹیز کو بند کر دیں اس کے بھائی اسلام آباد خفیہ ادارے کے پاس ہیں، اظہر مشوانی کی اہلیہ نے بیرون ملک جانا تھا اس کے لیے ہم نے پشاور ہائی کورٹ میں درخواست دائر کی۔

دوران سماعت، اسلام آباد ہائیکورٹ نے اظہر مشوانی کے دونوں بھائیوں کو بازیاب کرا کے عدالت پیش کرنے کا حکم دیا۔

جسٹس میاں گل حسن اورنگزیب نے ڈپٹی اٹارنی جنرل سے مکالمہ کرتے ہوئے کہا کہ یہ دیکھنا ہوگا آپ آئندہ سماعت پر کیا کہتے ہیں۔

وکیل نے کہا کہ وزارت داخلہ نے پشاور ہائیکورٹ میں جمع جواب میں سوشل میڈیا ایکٹیویٹیز سے متعلق باقاعدہ ناراضگی کا اظہار کیا، موبائل نمبر سے مشوانی کو کال گئی اور بتایا گیا اس کے بھائی اسلام آباد خفیہ ادارے کے پاس ہیں۔

عدالت نے ریمارکس میں کہا کہ آپ کا حلقے میں رکھ رکھاؤ ہے لیکن اب یہاں جو زیادہ گالی دیتا ہے، زیادہ بدزبان ہے اور جو زیادہ بدتہذیبی کرے گا وہ آگے آتا ہے، بہرحال اس کو سائیڈ پر کریں ایک حقیقی معاملہ تو ہے، جس پر وکیل بابر اعوان نے کہا کہ لاپتہ دونوں بھائیوں کا سیاست سے کوئی تعلق نہیں۔

جسٹس میاں گل حسن اورنگزیب نے ریمارکس دیے کہ ٹھیک ہے جو حالات آج کل ہیں آپ لوگ receiving اینڈ پر ہیں، کل وزیر اعظم نے کہا ہے کہ ملک شریعت کے مطابق ہی چلنا چاہیئے تو پھر ان معاملات کو بھی شریعت کے مطابق ہی چلائیں نا، آئندہ سماعت پر جواب دیکھیں گے بصورت دیگر میرے پہلے بھی آرڈرز موجود ہیں، آئندہ سماعت پر جواب کے بعد دیکھیں گے وگرنا اٹارنی جنرل کو بلائیں گے۔

پی ٹی آئی کے سوشل میڈیا انچارج اظہر مشوانی گھر پہنچ گئے

ہائیکورٹ نے بابر اعوان کو ہدایت کی کہ بغیر ریمانڈ کے اپنے پاس رکھنے اور قاضی کے سامنے پیش نا کرنے سے متعلق اسلامی نقطہ نظر سے بھی بتائیں۔

بعدازاں اسلام آباد ہائیکورٹ نے کیس کی مزید سماعت 13 اگست تک ملتوی کر دی۔