سندھ ہائیکورٹ نے ضلع وسطی سے لاپتا شہری کی بازیابی سے متعلق درخواست میں شہری کی گمشدگی کا مقدمہ درج کرنے کا حکم دیتے ہوئے محکمہ داخلہ سندھ کو فوری جے آئی ٹی تشکیل دینے کا حکم دے دیا۔

عدالت نے صوبائی حکومت، وفاقی حکومت اور دیگر سے 29 مئی کو جواب طلب کرلیا۔ وکیل درخواست گزار نے مؤقف اختیار کیا کہ فضل میر بھائی کی ضمانت کے بعد اسے سینٹرل جیل سے لینے گیا تھا، نامعلوم افراد زبردستی ساتھ لے گئے۔

جسٹس نعمت اللہ پھلپھوٹو پولیس صوبائی حکومت پر اظہار برہمی کیا اور ریمارکس دیے کہ یہ کیا مذاق ہے، ایک بھائی کو جیل سے نکال کر دوسرے کو غائب کردیا؟ اس قسم کے رویے برداشت نہیں کیے جائیں گے۔

انہوں نے اپنے ریمارکس میں کہا کہ لاپتا شہریوں کی گمشدگی فوری مقدمات درج کرکے سراغ لگانا ہوگا۔