پاکستان تحریک انصاف کے بانی رکن اکبر ایس بابر نے پی ٹی آئی کے تمام غیر ملکی خفیہ بینک اکاؤنٹس کی تحقیقات کا مطالبہ کردیا۔

بانی رہنما پی ٹی آئی اکبر ایس بابرنے وزیر داخلہ محسن نقوی کو باضابطہ خط لکھ کر پی ٹی آئی کے تمام غیرملکی خفیہ بینک اکاؤنٹس کی تحقیقات کا مطالبہ کیا ہے اور ساتھ ہی اس خط کی ایک کاپی وزیراعظم شہباز شریف کو بھی بھیج دی۔

وزیر داخلہ محسن نقوی کو لکھے گئے خط میں پی ٹی آئی کے بانی رکن اکبر ایس بابر نے کہا کہ پی ٹی آئی فارن فنڈنگ کیس کے فیصلے کو 20 ماہ ہوچکے لیکن اب تک کوئی عملدر آمد نہیں ہوا۔

اکبر ایس بابر نے کہا کہ نشاندہی کے باوجود غیر ملکی بینک اکاؤنٹس سے متعلق قانونی کارروائی نہیں ہوئی، غیرقانونی غیر ملکی خفیہ بینک اکاؤنٹس کا ملک دشمن کارروائیوں میں استعمال ہونا خارج ازامکان نہیں، بھرپور قانونی کارروائی سامنے نہیں آئی جو پریشان کن امر ہے۔

اکبر ایس بابر نے خط میں لکھا کہ 2 اگست 2022 کے فارن فنڈنگ کیس کے فیصلے کے تمام پہلوؤں پرعملدرآمد کرایا جائے، کسی سیاسی جماعت کا بیرون ملک بینک اکاؤنٹس کھولنا اور اسے خفیہ رکھنا جرم ہے۔

اکبر ایس بابر کا مزید کہنا تھا کہ پی ٹی آئی کی غیر قانونی غیر ملکی فنڈنگ ثابت ہونے کے باوجود قانونی کارروائی نہ ہونا پریشان کن بات ہے، ان تمام پاکستانی شہریوں کے خلاف بھی قانونی کارروائی کی جائے، جو شہری خفیہ غیر ملکی اور غیر قانونی اکاؤنٹس استعمال کر کے ملکی ساکھ کو نقصان پہنچا رہے ہیں۔