سابق وفاقی وزیر داخلہ رانا ثناء اللّٰہ نے کہا ہے کہ نوازشریف مولانا سے ووٹ مانگنے کی نیت سے نہیں آئے تھے، نواز شریف اور مولانا فضل الرحمان نے کبھی ایک دوسرے کی بات نہیں ٹالی، ملاقاتوں کا سلسلہ جاری رہے گا۔

نواز شریف کی مولانا فضل الرحمان سے ملاقات کے بعد مسلم لیگ ن کے رہنما رانا ثناء اللّٰہ نے میڈیا سے گفتگو کرتے کہا کہ نوازشریف اورمولانافضل الرحمان کی ملاقات اچھی رہی، دونوں رہنماؤں میں ون آن ون ملاقات بھی ہوئی ہے، ملاقات میں تمام قومی معاملات زیر غور لائے گئے۔

رانا ثناء اللہ نے کہا کہ مولانا فضل الرحمان نے اپنے موقف سے آگاہ کیا، ہمیں مولانا سے ہمیشہ رہنمائی ملتی رہی ہے، ہماری کوشش ہے وہ ہمارے ساتھ رہیں گے، ہم چاہتے ہیں مولانا فضل الرحمان کی رہنمائی موثر رہے۔

انہوں نے مزید کہا کہ نوازشریف مولانا سے ووٹ مانگنے کی نیت سے نہیں آئے تھے، ملک کو درپیش سیاسی صورتحال پر بات ہوئی ہے، ون آن ون ملاقات میں پاکستان کی بہتری کے لئے کسی نتیجہ پر پہنچیں ہوں گے۔

ن لیگ کے رہنما کا کہنا تھا کہ مولانا فضل الرحمان ہمارے ساتھ بہت شفیق ہیں انہیں ہم کہیں جانے نہیں دیں گے، مولانا فضل الرحمان کی ہم سے کوئی ناراضگی نہیں، محمود خان اچکزائی ایک معتبر اور محب وطن سیاست دان ہیں، محمود خان اچکزائی کو بھی ساتھ جوڑیں گے، جو احترام نوازشریف کی نظرمیں اورمولانا کی نظرمیں نواز شریف کا ہے وہ مثالی ہے۔