برطانیہ میں 9 سال بعد شدید برفباری کا سلسلہ جاری ہے جس نے پورے ملک کو برف سے ڈھک دیا ہے۔

برفباری کے باعث ملک کا پورا مواصلاتی نظام سمیت نظام زندگی بُری طرح متاثر ہو کر رہ گیا، جبکہ 150 سے زائد پروازیں منسوخ کردی گئیں ہیں۔

کارنوال سے اسکاٹش ہائی لینڈز تک اسکول اور دفاتر بند کر دیئے گئے اور ایبرڈین شائرمیں درجہ حرارت منفی 15 ڈگری سینٹی گریڈ تک گر گیا ہے۔

برطانیہ کے ساتھ ہی ساتھ یورپ میں بھی سردی کی لہر شدید ہوگئی، سویڈن میں بھی شدید برفباری کا سلسلہ جاری ہے درجہ حرارت منفی 13 ڈگری سینٹی گریڈ تک گر گیا جس کے باعث لوگ گھروں میں محصور ہوکر رہ گئے ہیں۔

محکمہ موسمیات کے مطابق سردی کی شدت میں مزید اضافہ ہوسکتا ہے اورلوگ غیر ضروری طور پر باہر نکلنے سے گریز کریں، جبکہ سردی کی شدت نے دارالحکومت اسٹاک ہوم سمیت پورے ملک کو اپنی لپیٹ میں لے لیا ہے۔