صوبوں نے توانائی کی بچت کے پیشِ نظر بازاروں کو رات ساڑھے 8 بجے بند کرنے پر اتفاق کرلیا ہے۔

وزیراعظم شہباز شریف کی زیر صدارت قومی اقتصادی کونسل کا اجلاس ہوا جس میں سندھ، پنجاب اور بلوچستان کے وزرائے اعلیٰ نے شرکت کی۔ اجلاس میں توانائی کی بچت سے متعلق اقدامات کیے گئے۔

وزیراعظم نے سندھ، پنجاب اور بلوچستان کو توانائی کے بحران سے نمٹنے کے لئے موثر اقدامات کرنے پر سراہا اور جب کہ توانائی کی بچت کے پیشِ نظر صوبوں نے بازاروں کو رات ساڑھے 8 بجے بند کرنے پر اتفاق کرلیا ہے۔

دوسری جانب وفاقی دارالحکومت میں رات 10 بجے تمام شادی ہالز بند کرنے کا بھی فیصلہ کرلیا گیا ہے، رشتہ ازدواج کی تقریب میں صرف ایک ڈِش کی اجازت ہوگی، اس سلسلے میں اسلام آباد میں دفعہ 144 نافذ کردی گئی ہے۔

ڈپٹی کمشنر اسلام آباد کا کہنا ہے کہ بجلی بحران اور مہنگائی کے پیشِ نظر اقردامات کیے جا رہے ہیں، جہاں بھی شادی کی تقریبات منعقد ہوتی ہیں ان سب مقامات پر یہ پابندی ہوگی جس کی خلاف ورزی پر گرفتار کرلیا جائے گا۔