مولانا سید ابو الاعلیٰ مودودی کے قریبی ساتھی جماعت اسلامی پاکستان کے سابق نائب امیر بزرگ سیاستدان و سینیٹر پروفیسر خورشید احمد 93 سال کی عمر میں برطانیہ کے شہر لیسٹر میں انتقال کرگئے۔

ذرائع کے مطابق امیر جماعت اسلامی پاکستان حافظ نعیم الرحمن ، سابق امیر جماعت اسلامی پاکستان سراج الحق نے پروفیسر خورشید احمد کے انتقال پر گہرے دکھ اور افسوس کا اظہار کیا اور لواحقین سے اظہار تعزیت بھی کیا۔

پروفیسر خورشید احمد جماعت اسلامی کے بزرگ اعلیٰ اوصاف کے حامل سیاسی رہنما عالمی معاشی دانشور اور کئی کتابوں کے مصنف اور کئی عالمی اداروں کے سربراہ تھے۔

مرحوم جماعت اسلامی کے بانی سید ابو الاعلیٰ مودودی کے دیرینہ ساتھیوں میں شامل تھے۔ پروفیسر خورشید کو اسلام کیلئے خدمات پر 1990 میں کنگ فیصل ایوارڈ سے نوازا گیا تھا، علاوہ ازیں انہیں حکومت پاکستان نے 2011 میں نشان امتیاز سے بھی نوازا گیا۔

جماعت اسلامی کے رہنماؤں نے کہا پروفیسر خورشید احمد کی ملی قومی خدمات کو ہمیشہ یاد رکھا جائے گا۔

وزیراعظم اور اسپیکر ایاز صادق کا اظہار افسوس

وزیراعظم شہباز شریف اور اسپیکر قومی اسمبلی ایاز صادق نے پروفیسر خورشید کی وفات پر اظہار افسوس کیا ہے۔

وزیراعظم نے مرحوم کے لیے بلند درجات اور ان کے اہلخانہ کے لیے صبر واستقامت کی دعا کی۔

وزیراعظم نے کہا کہ پروفیسر خورشید کی اسلامی معاشیات کی ترویج کے لیے قابل قدر خدمات ہیں، اللہ تعالیٰ مرحوم کو جنت الفردوس میں جگہ عطا فرمائے۔

اسپیکر ایاز صادق نے بھی پروفیسر خورشید کے انتقال پر گہرے دکھ کا اظہار کیا ہے۔

اسپیکر نے کہا کہ پروفیسر خورشید معروف ماہرمعیشت، علمی بصیرت کے حامل شخصیت تھے، پروفیسر خورشید کی مذہبی، سیاسی و سماجی خدمات ملک و ملت کے لیے روش باب ہیں۔