ملک کے مختلف علاقوں میں زلزلے کے جھٹکوں سے خوف و ہراس پھیل گیا اور شہری خوفزدہ ہو کر گھروں اور عمارتوں سے باہر نکل آئے۔ ابتدائی طور پر کوئی جانی نقصان رپورٹ نہیں ہوا۔

سوات اور گردونواح میں زلزلے کے جھٹکے محسوس کیے گئے، جن کی شدت ریکٹر اسکیل پر 4.3 ریکارڈ کی گئی۔ زلزلہ پیما مرکز کے مطابق زلزلے کی زیر زمین گہرائی 88 کلومیٹر تھی، جبکہ اس کا مرکز پاک، افغان اور تاجکستان کے سرحدی علاقوں میں واقع تھا۔

دہلی میں قدرت کا قہر: زلزلے سے بھی خطرناک ریت کے طوفان نے تباہی مچا دی

ادھر اسلام آباد، راولپنڈی، حسن ابدال، میانوالی اور گردونواح کے علاقوں میں بھی زلزلے کے شدید جھٹکے محسوس کیے گئے۔

محکمہ زلزلہ پیما کے مطابق ان علاقوں میں زلزلے کی شدت 5.5 ریکارڈ کی گئی، جبکہ اس کی زیر زمین گہرائی 12 کلومیٹر تھی۔ زلزلے کا مرکز راولپنڈی سے 60 کلومیٹر شمال مغرب میں واقع تھا۔

زلزلے کے بعد کئی علاقوں میں لوگ کلمہ طیبہ کا ورد کرتے ہوئے گھروں سے باہر نکل آئے۔

آئی پی ایل میچ کے دوران ریت کے طوفان نے تباہی مچا دی، کپتان چیختے رہ گئے

زلزلے کے بعد ابتدائی رپورٹس موصول: پی ڈی ایم اے

پروونشل ڈیزاسٹر مینجمنٹ اتھارٹی (پی ڈی ایم اے) کے ترجمان کے مطابق لاہور، راولپنڈی، گجرات، فیصل آباد سمیت دیگر علاقوں میں زلزلے کی لرزہ خیز کیفیت دیکھی گئی، جس سے شہریوں میں خوف و ہراس پھیل گیا۔

ڈی جی پی ڈی ایم اے کے مطابق پنجاب بھر کی ضلعی انتظامیہ کو الرٹ کر دیا گیا ہے اور عمارتوں کی چیکنگ کا عمل تیزی سے جاری ہے تاکہ کسی بھی ممکنہ نقصان سے بچا جا سکے۔

انہوں نے واضح کیا کہ تاحال صوبے کے کسی بھی علاقے سے جانی یا مالی نقصان کی کوئی اطلاع موصول نہیں ہوئی۔

میانمار اکثر خطرناک زلزلے کے واقعات کا شکار کیوں ہوتا ہے؟

پی ڈی ایم اے کے ترجمان نے بتایا کہ زلزلے کے ممکنہ آفٹر شاکس سے نمٹنے کے لیے ریسکیو مشینری اور عملہ الرٹ کر دیا گیا ہے۔ پراونشل کنٹرول روم اور ڈسٹرکٹ ایمرجنسی آپریشن سنٹرز کو 24 گھنٹے فعال رکھا گیا ہے۔

شہریوں سے اپیل کی گئی ہے کہ کسی بھی ممکنہ نقصان یا ہنگامی صورتحال کی اطلاع پی ڈی ایم اے کی ہیلپ لائن 1129 پر فوری طور پر دی جائے تاکہ بروقت امدادی کارروائیاں ممکن بنائی جا سکیں۔