پاکستان تحریک انصاف کے بانی چیئرمین عمران خان کی اہلیہ بشریٰ بی بی نے اڈیالہ جیل میں بہتر سہولیات کی فراہمی کے لیے اسلام آباد ہائیکورٹ سے رجوع کرتے ہوئے مزید سہولیات مانگ لیں۔

بشری بی بی نے وکلا کے ذریعے اسلام آباد ہائیکورٹ میں درخواست دائر کی، جس میں وفاق کو بذریعہ سیکرٹری داخلہ، سپرنٹنڈنٹ اڈیالہ جیل اور چیف کمشنر اسلام آباد کو فریق بنایا گیا ہے۔

اسلام آباد ہائیکورٹ میں دائر درخواست میں مؤقف اختیار کیا گیا کہ شریٰ بی بی اگست 2018 سے اپریل 2022 تک بطور خاتون اول وزیراعظم ہاؤس میں مقیم رہیں، بشریٰ بی بی اپنی بہتر معیار زندگی کی وجہ سے قانون کے مطابق بہترسہولیات کی حقدار ہیں۔

اپنی درخواست میں بشری بی بی نے کہا کہ بہتر سہولیات کے لیے جیل حکام کو درخواست کی، سپرٹینڈنٹ اڈیالہ جیل نے درخواست پر کان نہیں دھرے۔

درخواست میں مزید کہا گیا کہ بشری بی بی کے شوہر بانی پی ٹی آئی عمران خان کو اسی جیل میں بہتر سہولیات کا حقدار قرار دیا گیا ہے، فریقین کو اپنی قانونی ذمہ داریاں پوری کرنے کی ہدایت کی جائے۔

درخواست میں عدالت سے استدعا کی گئی کہ فریقین کو اپنی قانونی ذمہ داریاں پوری کرنے کی ہدایت کی جائے اور جیل رولز 1978 کے تحت بشریٰ بی بی کو بہتر سہولیات کی فراہمی کا حکم دیا جائے۔

واضح رہے کہ بشریٰ بی بی اڈیالہ جیل میں 190 ملین پاؤنڈ کیس میں 7 سال قید کی سزا کاٹ رہی ہیں۔