وزیراعلیٰ پنجاب مریم نواز شریف نے چاند رات اورعیدالفطر پر فول پروف سکیورٹی انتظامات کا حکم دے دیا اور چاند رات پر بازاروں میں ویمن پولیس اسکواڈ کے گشت کو بڑھانے کی ہدایت بھی کردی۔

تفصیلات کے مطابق وزیراعلیٰ پنجاب مریم نواز شریف نے چاند رات اور عیدالفطر پر فول پروف سیکیورٹی انتظامات اور بازاروں میں خواتین اور بچوں کا تحفظ ہر صورت یقینی بنانے کا حکم دے دیا۔

وزیراعلیٰ مریم نوازشریف کی ہدایت پر لاہور کے 6ٍ5 تجارتی مراکز پر اضافی نفری تعینات کردی گئی، بازاروں اور مارکیٹوں میں نگرانی کے لیے ڈرون کیمروں اور نائٹ ویژن دوربین کا استعمال شروع کر دیا گیا۔

چاند رات پر روڈز پر ون ویلنگ کی روک تھام کے لیے 55 مقامات پر ناکہ بندی اور پولیس تعینات کر دی گئی، اے ٹی ایم اور بینکوں کے اطراف میں 225 مقامات پر پولیس اہلکاروں کی ڈیوٹی لگا دی گئی۔

اس کے علاوہ بازاروں اور مارکیٹوں میں سماج دشمن عناصر کی آمد و رفت کی کڑی مانیٹرنگ کی ہدایت جاری کردی گئی ہے۔

پنجاب پولیس نے سیکیورٹی کے انتظامات کو ہائی الرٹ کردیا

دوسری جانب چاند رات اور عید الفطر کے موقع پر پنجاب پولیس نے سیکیورٹی کے انتظامات کو ہائی الرٹ کر دیا۔

آئی جی پنجاب ڈاکٹر عثمان انور کی ہدایت پر صوبے بھر میں اضافی نفری تعینات کی جائے گی تاکہ عوام کو محفوظ ماحول فراہم کیا جا سکے۔

چاند رات اور عید الفطر کے موقع پر لاہور سمیت صوبہ بھر کی مارکیٹوں اور اہم مقامات پر 21 ہزار سے زائد افسران و اہلکار تعینات کیے جائیں گے۔

ترجمان پنجاب پولیس کے مطابق چاند رات پر لاہور میں 4 ہزار افسران اور اہلکار سیکیورٹی کے فرائض انجام دیں گے جبکہ عید اجتماعات کے دوران لاہور میں 9 ہزار افسران و اہلکار تعینات ہوں گے۔

عید الفطر پر 29 ہزار سے زائد افسران و اہلکار 47 ہزار افراد کے اجتماعات کی سیکیورٹی پر مامور ہوں گے، سی سی ٹی وی کیمروں کے ذریعے مساجد، امام بارگاہوں اور دیگر اہم مقامات کی مانیٹرنگ بھی جاری رکھی جائے گی۔

آئی جی پنجاب عثمان انور نے سختی سے کہا ہے کہ ون ویلنگ، ہوائی فائرنگ، ہلڑ بازی اور پتنگ بازی کی اجازت نہیں دی جائے گی۔ علاوہ ازیں خواتین اور فیملیز کو ہراساں کرنے والوں کے خلاف سخت کارروائی کی جائے گی۔