پشاور سے روانہ والی جعفر ایکسپریس 300 مسافروں کو لے کر کوئٹہ پہنچ گئی، ریلوے اسٹیشنز پر ڈی ایس ریلوے اور دیگر حکام نے مسافروں کو استقبال کیا۔

گزشتہ روز پشاور سے روانہ ہونے والی جعفر ایکسپریس بحفاظت کوئٹہ پہنچ گئی، ریلوے اسٹیشن پر ڈویژن سپرنٹنڈنٹ (ڈی ایس) ریلوے عمران حیات اور دیگر حکام مسافروں کا استقبال کیا، اس موقع پر ریلوے اسٹیشن پر سیکورٹی کے سخت انتظامات کیے گئے تھے۔

ڈی ایس ریلوے عمران حیات کے مطابق جعفر ایکسپریس میں 300 مسافر پشاور سے کوئٹہ پہنچے جبکہ ٹرین 9 بوگیوں پر مشتمل تھی، ٹرین کی بروقت آمد سے مسافروں نے اطمینان کا اظہار کیا۔

ریلوے حکام کے مطابق جعفر ایکسپریس کا سفر معمول کے مطابق جاری رہا اور دوران سفر کسی بھی ناخوشگوار واقعے کی اطلاع نہیں ملی، مسافروں نے سہولیات پر ملا جلا ردعمل دیا، کچھ نے بہتر سفری انتظامات کو سراہا، جبکہ بعض نے صفائی اور دیگر سہولیات کی کمی کی شکایت کی۔

جعفر ایکسپریس پر حملے کا مقدمہ درج، کون سی دفعات لگائی گئیں

ریلوے انتظامیہ کا کہنا ہے کہ وہ مسافروں کو بہتر سفری تجربہ فراہم کرنے کے لیے سہولیات میں مزید بہتری کے لیے کوشاں ہیں۔

ڈی ایس ریلوے کا کہنا تھا کہ کوئٹہ سے کل 2 ٹرینیں روانہ ہوں گی، انہوں نے مزید کہا کہ کوئٹہ سے جیکب آباد تک سیکورٹی انتظامات کو اسر نو تر تیب دیا گیا ہے۔

دہشت گردی کا نشانہ بننے والی جعفر ایکسپریس 17 روز بعد کوئٹہ سے روانہ

قبل ازیں بلوچستان سے 17 روز سے معطل ٹرین کا رابطہ بالآخر بحال ہوگیا، جعفر ایکسپریس کی بحالی کے بعد پہلی ٹرین کوئٹہ سے پشاور کے لئے روانہ ہوگئی، رکن صوبائی اسمبلی جمال شاہ کاکڑ نے ٹرین کو رخصت کیا۔

کوئٹہ سے پشاور کینٹ کے لیے جعفر ایکسپریس 17 روز بعد روانہ کی گئی، 10 بوگیوں پر مشتمل ٹرین میں سوار 400 مسافر اپنی منزل کی جانب روانہ ہوئے۔

واضح رہے کہ 11 مارچ کو کوئٹہ سے پشاور کے لیے روانہ ہونے والی جعفر ایکسپریس پر دہشت گردوں نے حملہ کرکے مسافروں کو یرغمال بنالیا تھا۔

سرکاری دستاویز کے مطابق قانون نافذ کرنے والے اداروں نے دہشت گردوں کے خلاف 12 مارچ کی شام کو آپریشن شروع کیا جس میں 190 مسافروں کو بازیاب کرالیا گیا جبکہ 33 دہشت گردوں کو واصل جہنم کیا گیا، دوران آپریشن 5 اہلکاروں نے جام شہادت نوش کیا۔

جعفر ایکسپریس حملے کے متاثرین سے اظہار یکجہتی کیلئے ایئر یونیورسٹی کی جانب سے امن واک کا انعقاد

سرکاری دستاویز کے مطابق ٹرین میں مجموعی طور پر 380 مسافر سوار تھے، 354 مسافروں کو ٹرین سے بحفاظت نکالا گیا جبکہ 26 مسافر شہید ہوئے جبکہ ریلوے پولیس کا کانسٹیبل اور ریلوے کا ایک ملازم بھی شہید ہوا۔

دہشت گردی کے اس واقعے کے بعد کوئٹہ سے ریل گاڑیوں کی آمد و رفت معطل ہوگئی تھی، جس کے 16 روز بعد ٹرینوں کی آمدروفت بحال ہوئی اور آج جعفر ایکسپریس پشاور سے مسافروں کو لے کر کوئٹہ پہنچی۔