لاہور کے بازاروں میں چینی کی قیمت 180 روپے تک پہنچ گئی۔ کراچی والے بھی 164 روپے فی کلو کے احکامات سے فیض یاب نہ ہوسکے۔ شہر میں فی کلو چینی 175 روپے میں دستیاب ہے۔

لاہور کے مختلف بازاروں میں اس وقت چینی کی قیمت 180 روپے تک پہنچ گئی۔ دوسری جانب چینی کی ایکس مل پرائس میں اضافہ ہوگیا ہے۔ کریانہ مرچنٹ ایسوسی نے نئی قیمت پرتحفظات کا اظہار کر دیا ہے۔

کریانہ ایسوسی ایشن کے مطابق حکومتوں کا زور صرف چھوٹے دکاندار پرچلتا ہے، ناجائز منافع کمانے والے خود کو بری الزمہ قرار دلوانا چاہتے ہیں، چینی کا ریٹ بڑھانا ہی تھا توکرشنگ سیزن میں بڑھاتے۔

چینی کی قیمتوں میں مزید اضافہ، شہری مٹھاس کیلئے کڑوا گھونٹ پینے پر مجبور

شہریوں کا کہنا ہے کہ چینی ہر گھر کی بنیادی ضرورت ہے مگر ماہِ رمضان کا آغاز ہوتے ہی 125 روپے والی چینی کی قیمتوں کو پر لگ گئے اور قیمت 180 روپے کلو تک پہنچ گئی۔ دوکانداروں کا کہنا ہے کہ حکومت نے چینی کا ریٹ 164 روپے مقرر کیا ہے مگر اوپن مارکیٹ میں چینی 180 روپے کلو بیچی جارہی ہے۔ اس مقرر ریٹ پر چینی اکبری منڈی میں بھی دستیاب نہیں ہے۔

کریانہ مرچنٹ ایسوسی ایشن کا کہنا ہے کہ حکومت نے عوام کی بجائے مافیا کا ساتھ دیا، اگر چینی کا ریٹ بڑھانا تھا تو کرشنگ سیزن میں بڑھاتے تاکہ کسان کو بھی ریٹ ملتا۔

ادھر وفاقی حکومت کی جانب سے چینی کی قیمت 164 روپے کلو مقرر کرنے کے باوجود کراچی کے بازاروں میں چینی 170 سے 175 روپے کلو میں فروخت ہو رہی ہے۔

وفاقی وزیرغذائی تحفظ رانا تنویر حسین نے چینی قیمتوں کے حوالے سے گفتگو کرتے ہوئے کہا کہ ملک میں چینی 180 روپے فی کلو ہونے کی خبر بے بنیاد ہے، چینی کی قیمتوں میں کوئی اضافہ نہیں ہوا ہے۔

حکومت نے چینی کی قیمتوں میں اضافے کی خبروں کو بے بنیاد قرار دے دیا

انہوں نے کہا کہ حکومت نے چینی کی قیمتوں پرایکشن لیا ہے۔ یوٹیلیٹی اسٹور پر چینی 153روپے فی کلو فروخت ہو رہی ہے، جبکہ مارکیٹ میں چینی کی قیمت 164روپے فی کلو ہے۔

وفاقی وزیر کا کہنا تھا کہ ذخیرہ اندوزوں کے خلاف سخت کارروائی ہوگی، صوبوں کے ساتھ ملکر کام کر رہے ہیں، چینی کی قیمتوں میں اضافے کی افواہوں کو سختی سے مسترد کرتے ہیں، کسی کو چینی کی قیمت نہیں بڑھانے دیں گے۔

چینی کی قیمتوں میں اضافے پربیرسٹرسیف کی تنقید

ترجمان خیبر پختونخوا حکومت بیرسٹر سیف نے چینی کی قیمتوں میں اضافے پر وفاقی حکومت پر تنقید کرتے ہوئے کہا ہےکہ چینی کی قیمت، حکومت کے وزرا کی تنخواہیں اسپیڈ سے بڑھ رہی ہیں، قیمتوں میں اضافے کی وجہ چینی کے کارخانوں اور حکومت کے مالک ایک ہی ہیں۔

انہوں نے کہا کہ خام چینی درآمد کرنے کا فیصلہ چینی مافیا کو ناجائز فائدہ پہچانے کی کوشش ہے، حکمراں شوگر مافیا نے ناجائز منافع سے اپنی عید میٹھی کرتے ہوئے مہنگائی کے مارےعوام کی عید پھیکی کردی ہے۔

ترجمان کے پی حکومت بیرسٹرسیف نے کہا کہ شہباز شریف سے کہیں تنخواہ لے لیں لیکن چینی کی قیمت کم کرا دیں۔