اپوزیشن گرینڈ الائنس نے اعلان کیا ہے کہ دو روزہ کانفرنس آج ہر صورت اسلام آباد میں شروع ہوگی۔ الائنس میں تمام اپوزیشن جماعتوں کو شرکت کی دعوت دی، سلمان اکرم راجہ بولے فسطائیت پر بات کریں گے۔ بانی کی آواز کو دبا نہیں سکتے۔ شاہد خاقان عباسی کہتے ہیں چوری سے حکومت میں آنے والے آئین سے ڈرتے ہیں۔

محمود خان اچکزئی کی رہائش گاہ پر ہنگامی اجلاس کے بعد اپوزیشن اتحاد کے رہنماؤں محمود خان اچکزئی نے شاہد خاقان عباسی، صاحبزادہ حامد رضا، سلمان اکرم راجا و دیگر نے مشترکہ پریس کانفرنس میں آج اسلام آباد میں کانفرنس کرنے کا اعلان کردیا۔

محمود خان اچکزئی نے کہا اس ملک میں آئین سے کھیلنے والوں کو کوئی سزا نہیں ملتی، کسی کو اچھا لگے یا برا، یہ روایات ہم نے توڑنی ہیں۔

انھوں نے کہا کہ اپوزیشن گرینڈ الائنس کانفرس ہر حال میں ہوگی، ہمیں مجبور کیا گیا تو اسمبلی کی کارروائی نہیں کرنے دینگے۔

عوام پاکستان پارٹی کے سربراہ شاہد خاقان عباسی نے کہا ملک میں ایسی حکومت ہے جو عوام کی نمائندہ نہیں یہ حکمران عوام کی رائے سے گھبراتے ہیں۔

شاہد خاقان عباسی نے کہا کہ ہم ملک میں آئین کی بالادستی کی بات کررہے ہیں، چوری کے ذریعے حکومت میں آنے والے آئین سے ڈرتے ہیں، کل کھل کر آئین کے حوالے سے بات کریں گے۔

انھوں نے کہا کہ کانفرنس کیلئے ہال بک کیالیکن اجازت نہیں دی گئی، یہ کوئی جلسہ نہیں تھا یہ ایک کانفرنس ہے۔

پی ٹی آئی کے سیکرٹری جنرل سلمان اکرم راجا نے کہا کہ اپوزیشن گرینڈ الائنس کانفرس میں ہم فسطائیت پر بات کرینگے، ہم قانون کی حکمرانی کا تقاضا کرینگے۔ بانی چیئرمین کی آواز کو آپ نہیں دبا سکتے۔

سنی اتحاد کونسل کے سربراہ صاحبزادہ حامد رضا نے کہا یہ ملک ہمارے بڑوں نے بنایا تھا، آپ تمام مکتبہ فکر کی آواز کو نہیں دبا سکتے،بارش ہو طوفان ہو آج کانفرنس ہوگی۔

ساجد ترین نے کہا کہ بلوچستان اور پختونخوا کے 80 فی صد نوجوان پریشان ہیں، کل ہم نے 3 روزہ دورہ سندھ مکمل کیا، اس ملک میں جمہوریت کیلئے یک جہتی کی ضرورت ہے۔