لاہور کی انسداد دہشت گردی عدالت نے 9 مئی عسکری ٹاور حملہ سمیت 6 مقدمات میں پاکستان تحریک انصاف کے رہنماؤں شاہ محمود قریشی، ڈاکٹر یاسمین راشد سمیت دیگر ملزمان پر فرد جرم دوبارہ عائد کرنے کی ہدایت کردی جبکہ عدالت نے پراسکیوشن کی درخواست منظور کرلی۔

انسداد دہشت گردی عدالت لاہور میں تھانہ شاد مان جلاؤ گھیراؤ، راحت بیکری کے باہر جلاؤ گھیراؤ سمیت دیگر مقدمات کی سماعت ہوئی جبکہ جج منظر علی گل نے کوٹ لکھپت جیل میں جاکر کیسز کی سماعت کی۔

دوران سماعت خدیجہ شاہ، صنم جاوید اور عالیہ حمزہ سمیت دیگر ملزمان پیش ہوئے جبکہ شاہ محمود قریشی اور ڈاکٹر یاسمین راشد سمیت دیگر زیر حراست ملزمان کی حاضری مکمل کی گئی۔

عدالت نے پراسکیوشن کی مقدمات میں فرد جرم میں ترمیم کی درخواست منظور کرلی۔

عدالت نے ریمارکس دیے کہ اب ملزمان پر مقدمات میں دوبارہ فرد جرم عائد کی جائے گی۔ عدالت نے کیسز کی سماعت 20 فروری تک ملتوی کردی۔