وزیر اطلاعات سندھ شرجیل انعام میمن نے الزام عائد کیا ہے کہ متحدہ حادثات کو بنیاد بناکر کراچی میں فسادات کو ہوا دینے کی کوشش کررہی ہے، عوام جانتے ہیں کہ اصل فسادی کون ہیں؟

ایم کیو ایم پاکستان کے رہنما ڈاکٹر فاروق ستار کی پریس کانفرنس پر ردعمل دیتے ہوئے شرجیل میمن نے کہا کہ فاروق ستار اور دیگر متحدہ لیڈران ذہن نشین کرلیں کہ الزامات سے ان کا قد اونچا نہیں ہوگا، کراچی کے عوام دہائیوں تک متحدہ کی تشدد سے بھرپور دھونس والی سیاست کے رحم و کرم پرتھے۔

شرجیل میمن نے کہا کہ متحدہ نے ہمیشہ دوسروں کی میتوں کو سیاست کیلئےاستعمال کیا، فاروق ستار پیپلز پارٹی پر الزمات سے قبل اپنی تاریخ پر نظرڈالیں۔

انہوں نے کہا کہ فسادات، تشدد، بھتہ خوری، ٹارگٹ کلنگ متحدہ کی وطیرہ تھا، آفاق احمد کی گرفتاری قانون کے مطابق ہوئی، کوئی بھی قانون سے بالاتر نہیں ہے، متحدہ مگر مچھ کے آنسو بہانا بند کرے۔

ایم کیو ایم پاکستان کا آفاق احمد کی رہائی کا مطالبہ، سندھ حکومت پر کڑی تنقید

وزیر اطلاعات نے کہا کہ سندھ حکومت عوام کے مسائل حل کرنے جبکہ ایم کیو ایم انتشار پھیلانے میں مصروف ہے، پشتونوں اور اردو بولنے کے درمیان نفرت پھیلانے کی سازش ایم کیو ایم خود کرتی آئی ہے۔

ڈاکٹر فاروق ستار کی پریس کانفرنس زہریلی سوچ کا مربہ ہے، سعدیہ جاوید

ترجمان سندھ حکومت سعدیہ جاوید نے متحدہ قومی موومنٹ پاکستان کے رہنما کی پریس کانفرنس پر ردعمل دیتے ہوئے واضح کیا ہے کہ ڈاکٹر فاروق ستار کی پریس کانفرنس زہریلی سوچ کا مربہ ہے، یہ لوگ کراچی میں امن نہیں چاہتے، کراچی کے عوام ایم کیو ایم کی نفرت او تقسیم کی سیاست کو رد کر چکے ہیں۔

سعدیہ جاوید نے کہا کہ ایم کیو ایم کی تعصب، نفرت اور بدبودار سیاست کا جنازہ نکل چکا ہے، عوام ایم کیو ایم کے ڈراموں کو مسترد کرچکے ہیں، اب یہ چیخ و پکار بھی انہیں دوبارہ زندہ نہیں کرسکتی۔

ڈمپرز روزانہ کراچی کے شہریوں کو مار رہے ہیں کیا وہ بھی وفاق کا مسئلہ ہے؟ عظمی بخاری

انہوں نے کہا کہ جو لوگ عوام کے حقوق کے نام پر کراچی کو یرغمال بناتے رہے، وہ لوگ دوبارہ کراچی کا امن تباہ کرنے پر تلے ہیں، انہیں شرم آنی چاہیے۔

سعدیہ جاوید نے سوال کیا کہ ڈاکٹر فاروق ستار پہلے یہ بتائیں کہ اقتدار میں ہوتے ہوئے کراچی کے لیے سوائے تباہی اور لسانی سیاست کے کیا کام کیا؟ ڈاکٹر فاروق ستار کی پریس کانفرنس سے واضح ہوگیا کہ ایم کیو ایم کراچی میں امن نہیں چاہتی۔

ترجمان سندھ حکومت تحسین عابدی نے ایم کیو ایم کے الزامات کو مسترد کرتے ہوئے کہا ہے کہ ایم کیو ایم اپنی ناکامیاں چھپانے میں مصروف ہے۔

فاروق ستارکا منجن پیپلز پارٹی الزامات سے ہی بکتا ہے، تحسین عابدی

تحسین عابدی نے کہا کہ فاروق ستارکا منجن پیپلز پارٹی الزامات سے ہی بکتا ہے، ایم کیوایم اشتعال انگیزی کے بجائے تعمیری سیاست کرے۔

انہوں نے کہا کہ ایم کیو ایم نے آفاق احمد کی گرفتاری پر خوشیاں منائیں، ایم کیوایم کی رہی سہی مقبولیت آفاق کے پلڑےمیں جانےلگی، اس صورتحال میں کھسیانی بلی کھمبا نوچ رہی ہے۔

پی پی رہنما نے کہا کہ سندھ حکومت کسی دباؤ کوخاطر میں نہیں لائے گی، ڈمپر مافیا کے خلاف پہلے بھی کارروائیاں کی، آئندہ بھی ہونگی۔

سیدہ تحسین عابدی نے کہا کہ ایم کیو ایم صرف سیاسی پوائنٹ اسکورنگ کر رہی ہے، پیپلز پارٹی کراچی کے عوام کے ساتھ کھڑی ہے۔

100 سے زائد شہری ڈمپر مافیا کی نذر ہوچکے ہیں، فاروق ستار

ایم کیو ایم پاکستان کے سینئر رہنما فاروق ستار نے مہاجر قومی موومنٹ کے رہنما آفاق احمد کی فوری رہائی کا مطالبہ کیا اور سندھ حکومت پر شدید تنقید کرتے ہوئے کہا کہ صوبے میں ظلم اور ناانصافی کا سلسلہ بدستور جاری ہے۔

فاروق ستار کراچی میں پریس کانفرنس کرتے ہوئے کہا کہ سندھ حکومت اقتدار کی آڑ میں کرپشن میں ملوث ہے اور کراچی کے شہریوں کو ڈمپر مافیا کے رحم و کرم پر چھوڑ دیا گیا۔

انہوں نے ماضی کے واقعہ کا حوالہ دیتے ہوئے کہا کہ بشریٰ زیدی کی ٹریفک حادثے میں ہلاکت کے بعد کراچی کی سیاست میں بڑی تبدیلی آئی تھی، اور آج بھی شہر میں ویسی ہی صورتحال ہے۔

انہوں نے خبردار کیا کہ اگر عوام کو ریلیف نہ دیا گیا تو 1985 جیسے حالات دوبارہ پیدا ہوسکتے ہیں۔ ان کا کہنا تھا کہ کراچی میں پہلے ٹرانسپورٹ مافیا سرگرم تھا، اور اب ڈمپر مافیا بے قابو ہوچکا ہے۔

فاروق ستار کے مطابق 100 سے زائد شہری ڈمپر مافیا کی نذر ہوچکے ہیں، لیکن حکومت خاموش تماشائی بنی ہوئی ہے۔ انہوں نے وزیراعلیٰ سندھ پر تنقید کرتے ہوئے کہا کہ انہوں نے ڈمپر مافیا کے خلاف ایک بیان تک جاری نہیں کیا۔