محکمہ داخلہ پنجاب نے انٹرنیشنل کرکٹ کونسل ( آئی سی سی ) چیمپئنز ٹرافی 2025 کے سیکیورٹی انتظامات کیلئے آرمی و رینجرز کی تعیناتی کی منظوری دے دی۔

جمعے کو چیئرمین کابینہ کمیٹی برائے امن وامان خواجہ سلمان رفیق کی زیرصدارت محکمہ داخلہ میں اہم اجلاس ہوا، جس میں سیکرٹری داخلہ نورالامین مینگل نے صوبہ بھر کے امن و امان کی تازہ صورتحال بارے بریفنگ دی۔

کابینہ کمیٹی نے آئی سی سی چیمپئنز ٹرافی کے لیے سکیورٹی انتظامات کا جائزہ لیا اور قذافی اسٹیڈیم لاہور اور راولپنڈی کرکٹ اسٹیڈیم کی جوائنٹ سیکیورٹی آڈٹ رپورٹ کے مطابق فول پروف انتظامات کو یقینی بنانے کی ہدایت کی گئی۔

کابینہ کمیٹی نے کرکٹ سیریز کے لیے آرمی کی 5 کمپنیوں اور رینجرز کے ایک ونگ کی تعیناتی کی بھی منظوری دی۔

دروان بریفنگ بتایا گیا کہ کرکٹ میچز سے قبل سٹیڈیم کے گرد سیف سٹی کے تمام کیمرے آپریشنل کردیے گئے ہیں، سالانہ تبلیغی اجتماع رائے ونڈ کے لیے فول پروف سیکیورٹی کی ہدایت کی گئی۔

چیئرمین کابینہ کمیٹی برائے امن و امان خواجہ سلمان کا کہنا ہے کہ پاکستان میں بین الاقوامی کرکٹ سیریزکےپرامن انعقاد سے عالمی سطح پر بہتر تشخص اجاگرہوگا۔