مسلم لیگ (ن) کے سینیٹرعرفان صدیقی نے جمعیت علمائے اسلام (ف) کے سربراہ مولانا فضل الرحمان سے ملاقات کی، جس میں انہوں نے مذاکراتی عمل کی پیشرفت سے آگاہ کیا۔

حکومتی اتحادی مذاکراتی کمیٹی کے ترجمان سینیٹر عرفان صدیقی نے مولانا فضل الرحمان سے ان کی رہائش گاہ پر ملاقات کی اور علالت پر ان کی مزاج پرسی کی۔

ملاقات کے دوران سینیٹرعرفان صدیقی نے مولانا فضل الرحمان کو مذاکراتی عمل کی پیشرفت سے آگاہ کیا۔

اس موقع پر گفتگو کرتے ہوئے مولانا فضل الرحمان کا کہنا تھا کہ سیاسی جماعتوں کے درمیان مذاکرات جمہوری عمل کا اہم جزو ہیں، افہام و تفہیم سے گریز اور مذاکرات سے انکار غیر جمہوری رویہ ہے۔

انہوں نے مزید کہا کہ بڑے بڑے مسائل مل بیٹھ کر آپس میں بات چیت کے ذریعے ہی طے کیے جا سکتے ہیں، پاکستان کو ہر اعتبار سے استحکام اور باہمی اتحاد کی ضرورت ہے جس کے لیے سیاسی ہم آہنگی ضروری ہے۔

آخر میں سینیٹر عرفان صدیقی نے دینی مدارس کی رجسٹریشن کے معاملے کو خوش اسلوبی سے سلجھانے کے لیے مولانا فضل الرحمان کی کوششوں کو سراہا۔

مولانا فضل الرحمان کا نواز شریف سے ٹیلی فون پر رابطہ

جمعیت علمائے اسلام (ف) کے سربراہ مولانا فضل الرحمان نے مسلم لیگ (ن) کے صدر نواز شریف سے ٹیلی فون پر رابطہ کیا ہے۔

پارٹی ذرائع کے مطابق جے یو آئی کے سربراہ مولانا فضل الرحمان کا سابق وزیراعظم نواز شریف سے ٹیلی فونک رابطہ ہوا ہے۔

مولانا فضل الرحمان نے نواز شریف کو فون پر ان کے پوتے کی شادی پر مبارک باد دی اور نئے شادی شدہ جوڑے کے لیے نیک خواہشات کا اظہار کیا۔

پارٹی ذرائع کے مطابق نواز شریف نے نیک خواہشات کے اظہار پر مولانا فضل الرحمان کا شکریہ ادا کیا۔