بھارتی فاسٹ بولر جسپریت بمراہ نے ٹیسٹ کرکٹ میں بھارت کے لیے نئی تاریخ رقم کر دی۔

یکم جنوری کو آئی سی سی کی جانب سے نئی ٹیسٹ پلیئرز رینکنگ جاری کی گئی، جس میں جسپریت بمراہ نے اپنے ملک کے لیے نیا ریکارڈ بنادیا۔

آئی سی سی کی تازہ ترین ٹیسٹ رینکنگ میں بمراہ نہ صرف بولرز کی فہرست میں پہلے نمبر پر رہے بلکہ کسی بھی بھارتی بولر کے لیے اب تک کے سب سے زیادہ ریٹنگ پوائنٹس کا ریکارڈ بھی قائم کر دیا۔

آسٹریلیا کے خلاف بارڈر گواسکر ٹرافی میں اب تک 4 ٹیسٹ میچز میں بمراہ 30 وکٹیں لے کر نمایاں بولر رہے ہیں۔

آئی سی سی ٹیسٹ کرکٹر آف دی ایئر کی نامزدگیوں کا اعلان

بارڈرگواسکر ٹرافی میں اپنی شاندار کارکردگی کی وجہ سے آئی سی سی رینکنگ میں بمراہ کے ریٹنگ پوائنٹس بڑھ گئے ہیں اور انہوں نے اب 907 ریٹنگ پوائنٹس حاصل کر لیے ہیں جوکہ کسی بھی بھارتی بولر کے ٹیسٹ کرکٹ کی تاریخ میں سب سے زیادہ ریٹنگ پوائنٹس ہیں۔

اس سے قبل حال ہی میں ریٹائر ہونے والے اسپنر روی چندرن ایشون نے 2016 میں آئی سی سی رینکنگ میں 904 ریٹنگ پوائنٹس حاصل کرکے ریکارڈ بنایا تھا۔

واضح رہے کہ جسپریت بمراہ کو سر گارفیلڈ سوبرز ٹرافی کے لیے آئی سی سی مینز کرکٹر آف دی ایئر اور آئی سی سی مینز ٹیسٹ کرکٹر آف دی ایئر ایوارڈ کے لیے نامزد کیا گیا ہے۔