وزیر اعلی خیبر پختونخوا علی امین گنڈا پور نے کہا ہے کہ حکومت سے مذاکرات بانی پی ٹی آئی عمران خان کے احکامات کے مطابق ہوں گے، مذاکرات پاکستان کے لیے کررہے ہیں۔

پارلیمنٹ آمد پر میڈیا سے گفتگو کرتے ہوئے وزیر اعلیٰ خیبر پختو نخوا علی امین گنڈاپور نے کہا ہے کہ وہ تو مذاکرات کرنے آئے ہیں، اُن سے سوال کیا گیا کہ کیا مذاکرات میں مثبت پیش رفت ہوگی؟ جس کا جواب دیتے ہوئے علی امین گنڈاپور نے کہا کہ ان شاء اللّٰہ، انہیں مذکرات سے امید ہے۔

علی امین گنڈا پور نے کہا کہ کمیٹی بنی ہے اس کا وجود میں آنا ہی ثبوت ہے معاملات ٹھیک کیے جائیں، حکومت سے مذاکرات بائی پی ٹی کے احکامات کے مطابق ہوں گے اور پاکستان کے لیے کررہے ہیں، مذاکرات میں پہلی بار آیا ہوں کھل کر بات چیت ہو گی، آفر کہاں سے کیسے آتی ہے وقت سے پہلے کچھ نہیں کہا جا سکتا۔

وزیر اعلی خیبر پختونخوا نے مزید کہا کہ ایس آئی ایف سی کی میٹنگ تھی، ایس آئی ایف سی میں کافی بات ہوئی ہے، کل ہماری میٹنگ ہے اس میں لاء اینڈ آرڈر کے ایشو پر بات ہوگی۔

ایک سوال پر کہ آپ کی محسن نقوی سے ملاقات بانی پی ٹی آئی کو پسند نہیں آئی کا جواب دیتے ہوئے علی امین گنڈا پور نے کہا بانی پی ٹی آئی نے اس حوالے سے بات کی ملاقات کی ایک تصویر تھی ظاہر ہے 26 نومبر کا واقعہ ہوا تھا، ہمارے کارکن شہید اور زخمی ہوئے، حکومتی نمائندہ ہونے کی وجہ سے ملاقاتیں کرنا پڑتی ہیں، لا اینڈ آرڈر کے مسئلے پر وزارت داخلہ کا کردار اہم ہوتا ہے۔