غزہ میں آٹا لینے کے لیے قطاربند لوگوں پر اسرائیلی فوج کے حملے میں 22 افراد شہید ہوگئے۔ شہید ہونے والوں میں خواتین اور بچے بھی شامل ہیں۔ اسرائیل نے پیر کو بھی غزہ کے طول و عرض میں بمباری جاری رکھی۔

غزہ کی پٹی میں بجلی کی قلت کے نتیجے میں اسپتالوں میں 100 سے زائد مریضوں کے جاں بحق ہونے کا خطرہ ہے۔

اسرائیلی فوج نے پیر کی صبح شمالی غزہ میں جبالیہ پناہ گزین کیمپ کو نشانہ بنایا۔ ایک ڈرون سے میزائل داغا گیا۔ تین افراد موقع پر شہید ہوگئے۔

غزہ کے علاقے دیر البلا میں الجزیرہ میڈیا آؤٹ لیٹ کے مرکز سے ہانی محمود نے بتایا کہ ڈرون سے حملہ اُس وقت کیا گیا جب لوگ خوراک کی تلاش میں گھروں سے نکل رہے تھے۔

الجزیرہ نے بتایا کہ بہت سے لاشیں اب بھی گلیوں میں پڑی ہوئی ہیں اور وہاں پہنچ کر لاشیں نکالنے والے بھی نہیں ہیں۔

جبالیہ کا اسرائیلی فوج نے 65 دن سے محاصرہ کر رکھا ہے۔ ہزاروں فلسطینیوں کو خوراک اور پانی سے محروم رکھا گیا ہے۔ بہت سے لوگ فاقہ کشی سے انتہائی لاغر ہوچکے ہیں۔ بیماروں کی حالت نازک ہے۔

الجزیرہ کے ہانی محمود نے بتایا کہ جبالیہ کیمپ اب قبرستان میں تبدیل ہوچکا ہے۔ رات گئے جنوبی شہر رفاہ میں آٹا خریدنے کے لیے جمع ہونے والوں پر حملے میں 10 افراد مارے گئے تھے۔