لاہور ہائکورٹ نے الیکشن کمیشن کے ممبران اسمبلی کو نااہل کرنے کے اختیار کے خلاف درخواست پر فل بینچ بنانے کی سفارش کر دی۔

الیکشن کمیشن کے ممبران اسمبلی کو نااہل کرنے کے اختیار کے خلاف درخواست پر سماعت لاہور ہائکورٹ میں ہوئی، جسٹس رسال حسن سید نے شہری منیر احمد کی درخواست پر سماعت کی۔

عدالت نے درخواست پر فل بینچ بنانے کی سفارش کرتے ہوئے فائل چیف جسٹس لاہور ہائیکورٹ مس عالیہ نیلم کو ارسال کردی۔ ‏ درخواست گزار کے وکیل اظہر صدیق ایڈووکیٹ نے مؤقف اپنایا کہ ‏الیکشن ایکٹ 2017 کی سیکشن 137 کی شق 4 آئین سے متضاد ہے، ‏الیکشن کمیشن کے پاس عدالتی اختیار نہیں ہے، اسی لیے کسی کو نااہل نہیں کرسکتا، ‏الیکشن کمیشن عدالتی اختیارات استعمال نہیں کرسکتا، ‏الیکشن کمیشن براہ راست کسی کو نااہل قرار نہیں دے سکتا۔

درخواست گزار کی جانب سے استدعا کی گئی کہ عدالت الیکشن کمیشن کا نااہلی کا اختیار کلعدم قرار دے۔