خیبرپختونخوا کے شہر نوشہرہ میں نامعلوم افراد کی گاڑی پر فائرنگ سے 2 بھائیوں سمیت 3 افراد جاں بحق ہوگئے۔

پولیس کے مطابق فائرنگ کا واقعہ نوشہرہ کی تحصیل پبی میں پیش آیا جہاں نامعلوم افراد نے گاڑی پر فائرنگ کردی تاہم فائرنگ کے نتیجے میں گاڑی میں سوار 3 افراد جان کی بازی ہار گئے۔

جاں بحق افراد میں 2 سگے بھائی اور چچا شامل ہیں، جاں بحق ہونے والوں کی شناخت سید محمد، سبحان اللہ اور حسن خان کے ناموں سے ہوئی ہے۔

مقامی ذرائع کے مطابق فائرنگ کا واقعہ پرانی دشمنی پر پیش آیا، دونوں فریقین جمال شاہ اور گل حا جی کے درمیان دشمنی تھی جبکہ ملزمان ارتکاب جرم کے بعد فرار ہونے میں کامیاب ہوگئے۔

جان بحق افراد کی لاشوں کو پوسٹ مارٹم کے لیے میاں راشد حسین شہید میموریل اسپتال پبی منتقل کردیا گیا جبکہ پولیس نے موقع پر پہنچ کر ملزمان کی گرفتاری کے لیے چھاپے شروع کردیے۔