پولیس لائنز قلعہ گجر سنگھ میں کرپشن کا سکینڈل سامنے آنے کے بعد لیڈی ہیڈ محرر اور نائب محرر کو رشوت لینے پر معطل کر دیا گیا۔

پولیس ذرائع کے مطابق ہیڈ محرراقصی عزیز اور نائب محررکرن جمال حاضریاں لگانے کیلئے ماہانہ رشوت وصول کرتی تھیں جبکہ رشوت لیتے ہوئے دونوں کی ویڈیو منظر عام پر آ گئی۔

ویڈیو میں ہیڈ محرر اور نائب ہیڈ محرر کو رشوت لیتے دیکھا جا سکتا ہے۔ دونوں کے علاوہ مزید 2 آفیسرز بھی اپنا ماہانہ حصہ وصول کرتے دیکھے جا سکتے ہیں۔

ذرائع کے مطابق دونوں عہدیدار 24 لیڈی کانسٹیبلز کی حاضریاں لگانے میں ملوث تھے۔ ذرائع کا کہنا ہے کہ گزشتہ ایک سال سے ہیڈ محرر اور نائب محرر حاضری کے عوض پیسے لے رہی ہیں۔ ایک لیڈی کانسٹیبل سے ماہانہ 25 ہزار روپے لیے جا رہے تھے۔ فی میل ہیڈ محرر اور نائب محرر انسپکٹر فرحت لبنی ٰکو بھی حصہ دیتی تھیں۔

ذرائع کے مطابق ایس پی ہیڈ کوارٹر کے پی اے امتیاز بھی ان خواتین محرر سے ماہانہ حصہ لیتا ہے، 24 اہلکاروں سے ماہانہ 6 لاکھ جمع ہوتے تھے جو چار افراد میں تقسیم ہوتے تھے۔

پولیس ذرائع کے مطابق لائن انسپکٹرفرحت لبنیٰ اورریڈر عامر کو عہدے سے ہٹا دیا گیا ہے جبکہ آپریٹرکانسٹیبل عرفان کو بھی شوکاز نوٹس جاری کر دیا گیا۔ پولیس ذرائع کا کہنا ہے کہ رشوت کی ویڈیو ایک سال پرانی ہے۔ ایس پی ہیڈکوارٹر زنیر چیمہ نے معطلی کا نوٹیفکیشن جاری کر دیا ہے۔