ایس ایس پی کورنگی توحید رحمان میمن نے کہا ہے کہ پولیس یونیفارم پہن کراور ٹک ٹاک ویڈیوز بنا کر پولیس افسر کا روپ دھارنے والے ایک شخص کو گرفتار کر لیا گیا۔

گرفتاری الفلاح پولیس کی جانب سے معمول کے گشت کے دوران عمل میں آئی جہاں مشتبہ شخص کو پولیس افسر کے لباس میں ٹک ٹاک ویڈیوز بناتے ہوئے پکڑا گیا۔

ملزم جس کی شناخت عاطف عرف وکی بابو کے نام سے ہوئی ہے، اس سے قبل اپنی ویڈیوز کے لیے سوشل میڈیا پر وائرل ہو چکا تھا۔ جعلی پولیس اہلکار کے خلاف الفلاح تھانے میں مقدمہ درج کر لیا گیا۔

واضح رہے کہ 4 ستمبر کو ایک خاتون اہلکار سمیت دو پولیس کانسٹیبلز کو ڈیوٹی کے دوران ٹک ٹاک ویڈیوز بنانے پر ساؤتھ زون میں معطلی کا سامنا کرنا پڑا تھا۔

ساؤتھ زون پولیس کے مطابق ڈی آئی جی ساؤتھ سید اسد رضا نے وائرل ویڈیو کا نوٹس لیتے ہوئے گزری تھانے میں تعینات خاتون کانسٹیبل ماریہ گل کو معطل کرنے کا حکم دیا۔

ٹک ٹاک ویڈیو میں معطل خاتون افسر نے اپنی ڈیوٹی لوکیشن کا انکشاف کرتے ہوئے کہا کہ ”لوگوں میں یہاں ہوں، جو بھی مجھ سے ملنا چاہتا ہے وہ یہاں آ سکتا ہے۔“ ڈی آئی جی ساؤتھ نے زور دے کر کہا کہ محکمہ پولیس ایک پیشہ ور ادارہ ہے اور اس طرح کے غیر ذمہ دارانہ رویے کو برداشت نہیں کیا جائے گا۔

اسی طرح ایس ایس پی سٹی عارف عزیز نے بغدادی تھانے کی ایک ٹک ٹاک ویڈیو کا سخت نوٹس لیا جس میں کانسٹیبل ذیشان کو اسلحہ دکھاتے ہوئے دکھایا گیا۔

ایس ایس پی عزیز نے بتایا کہ کانسٹیبل نے 2022 میں ویڈیو ریکارڈ کی تھی لیکن اسے 2023 میں ٹک ٹاک پر اپ لوڈ کیا گیا تھا۔ انہوں نے مزید واضح کیا کہ کسی بھی پولیس افسر کو اس طرح سے اسلحے کے غلط استعمال یا نمائش کی اجازت نہیں ہے۔