پاکستان تحریک انصاف (پی ٹی آئی) کے بانی چیئرمین عمران خان نے کہا ہے کہ مجھے جنرل فیض حمید کے ٹرائل سے ڈرایا جا رہا ہے، جنرل (ر) باجوہ کے بغیر فیض حمید کا ٹرائل بڑی بدنیتی ہے، سپریم کورٹ نے نیب ترامیم کو فیصلہ سنایا ہے، اس فیصلے سے ہمارا توشہ خانہ کا نیا کیس تو فارغ ہوگیا مجھے تو خوشی منانی چاہیئے، عاصم منیر نے نواز شریف کے ساتھ مل کر لندن معاہدہ کیا تھا، ان سے کہتا ہوں غیر سیاسی ہوجاؤ۔

اڈیالہ جیل میں صحافیوں سے غیر رسمی گفتگوکرتے ہوئے سابق وزیراعظم عمران خان کہا کہ حکومت کو این آر او ٹو مبارک ہو، 190 ملین پاؤنڈ ریفرنس بھی تقریبآ ختم ہونے والا ہے، سپریم کورٹ نے نیب ترامیم کا فیصلہ سنایا ہے، اس فیصلے سے ہمارا توشہ خانہ کا نیا کیس تو فارغ ہوگیا مجھے تو خوشی منانی چاہیئے یہ جو اوپر بیٹھے ہیں ان سب کے پیسے باہر پڑے ہیں، شہباز شریف کے خلاف مقصود چپڑاسی کا 24 ارب کرپشن کا کیس ہم نے بنایا تھا، ان کے خلاف کرپشن کے باقی سارے کیسز پرانے ہیں جو انہی کے دور حکومت میں بنے ہیں۔

عمران خان نے کہا کہ عوامی نمائندے کرپشن کرتے ہیں پھر اپنے کیسز ختم کرنے کیلئے قانون پاس کرواتے ہیں اب وائٹ کالر کرائم پکڑنا ناممکن ہوگیا انہوں نے چوری ڈاکےکے راستے کھول دیے ہیں، اڈیالہ جیل میں ساڑھے 7 ہزار قیدی ہیں ان کو ان قوانین کا کیا فایدہ ہوگا، جیسے ہی میں رہا ہوا چیئرمین نیب کو پکڑوں گا، اس کو عدالت لے کر جاؤں گا، نیب کے تفتیشی افسر اور وعدہ معاف گواہ انعام شاہ کے اوپر کیسز کروں گا ان کی وجہ سے میری بیوی 7 ماہ سے جیل میں ہے، نیب نے ایک کروڑ 80 لاکھ مالیت کے ہار کی قیمت 3 ارب 18 کروڑ لگائی۔

بانی پی ٹی آئی نے غیر رسمی گفتگو کرتے ہوئے مزید کہا کہ ڈی جی آئی ایس پی آر نے کہا ہے وہ غیر جانبدار اور غیر سیاسی ہیں، فوج اگر اب غیر سیاسی ہوگئی ہے تو اس سے بڑی ملک کی کوئی خدمت نہیں ہوگی، غیر سیاسی کہنے سے نہیں اعمال سے ہوتا ہے، اگر یہ کہہ رہے ہیں ہم ہمیشہ غیر سیاسی تھے تو اسے بڑی غلط بیانی کوئی نہیں ہوسکتی۔

سیاسی نقطہ نظر میں اختلاف کو نفرتوں میں نہ ڈھلنے دیں، آرمی چیف کا یوم دفاع و شہدا کی تقریب سے خطاب

سابق وزیراعظم کا کہنا تھا کہ اگر یہ غیر سیاسی ہیں تو میجر اور کرنل کا جیل میں کیا کام ہے، میری بیوی عاصم منیر کی وجہ سے جیل میں ہے، 9 مئی انہوں نے کروایا اور پی ٹی آئی ڈسمینٹل کی، 8 فروری کی دھاندلی بھی انہوں نے کروائی، عاصم منیر نے نواز شریف کے ساتھ مل کر لندن معاہدہ کیا تھا، میں آج ان سے اپیل کرتا ہوں خدا کے لیے غیر سیاسی ہوجاؤ ملک تباہی کے دہانے پر ہے۔

سابق وزیراعظم کا کہنا تھا کہ 9 مئی کی سی سی ٹی وی فوٹیجز ان کے پاس ہیں سامنے لائیں، 9 مئی ہماری پارٹی ختم کرنے کے لیے کروایا گیا تھا، میری گرفتاری کا آرڈر کس نے دیا اس کی انکوائری کرائیں، یہ مجھے جنرل فیض حمید کے ٹرائل سے ڈرا رہے ہیں، جنرل فیض جب بھی ملنے آتا تھا وہ جنرل باجوہ کی اجازت سے آتا تھا، آئی ایس آئی چیف آرمی چیف کے ماتحت ہوتا ہے وہ بعد جنرل باجوہ کو ہر چیز رپورٹ کرتا تھا، باجوہ مجھ سے ملاقات میں اس کی تصدیق کرتا تھا، جنرل باجوہ کے بغیر جنرل فیض کا ٹرائل بڑی بدنیتی ہے۔

جنرل (ر) فیض کا ٹرائل اوپن کورٹ میں کیا جائے، عمران خان کا آرمی چیف سے مطالبہ

عمران خان نے کہا کہ جنرل باجوہ کو انکوائری سے باہر رکھنا بھی بڑی بدنیتی ہے، جنرل باجوہ کو اس لیے باہر رکھا جا رہا ہے کیونکہ رجیم چینج اس نے کیا تھا، جنرل باجوہ کو ٹرائل میں شامل کیا گیا تو سارے بھید کھل جائیں گے اور یہ سارے پکڑے جائیں گے، ملک تباہی کی طرف جارہا ہے، قرضے بڑھتے جارہے ہیں، آمدن سکڑتی جارہی ہے۔

لیفٹیننٹ جنرل فیض حمید نے سیاسی عناصر کے کہنے پر فوجی قوانین کی خلاف ورزی کی، ڈی جی آئی ایس پی آر

غیر رسمی گفتگو کرتے ہوئے بانی چیئرمین پی ٹی آئی عمران خان نے مزید کہا کہ میں ملک اور عوام کے لیے لڑ کر جہاد کر رہا ہوں میں نے اپکو رپورٹرز کو بہت بارود دیا ہے اب اپ نے ڈرنا نہیں ہے، میں نے یہ ملک چھوڑ کر نہیں جانا، ساری زندگی ادھر رہوں گا یہ جو اوپر بیٹھے ہیں ان کے پیسے باہر پڑے ہیں۔

انہوں نے کہا کہ علی امین گنڈاپور کے خلاف کچھ لوگ پارٹی کے اندر سازشیں کررہے ہیں، پارٹی کو کہتا ہوں کہ علی امین گنڈاپور کو انڈر مائن نا کریں، میں علی امین گنڈاپور کے ساتھ کھڑا ہوں، مکمل بیک اپ کر رہا ہوں، پوری پارٹی کو کہتا ہوں یہ وقت اختلافات کا نہیں ہے، جو لوگ علی امین کے خلاف سازشیں کررہے ہیں وہ بعد میں نہ کہیں کہ ٹکٹ نہیں ملا، ہمارے لوگوں کو پی ٹی آئی کے نام پر ٹکٹ ملا ہے اور وہ جیتے، پیسے لگا کر نہیں جیتے جو سازش کر رہے ہیں انہیں کہتا ہوں پھر نہ کہنا ٹکٹ نہیں ملا،پھر اگلی مرتبہ ٹکٹ نہیں دوں گا۔