پاسپورٹ کنٹرول لسٹ سے نام نکلوانے کے لیے سابق وزیرِ اعلیٰ پنجاب چوہدری پرویز الہٰی اور دیگر کی درخواست لاہور ہائیکورٹ میں سماعت کے لیے مقرر ہوگئی۔

لاہور ہائیکورٹ کے جسٹس شمس محمود مرزا سابق وزیراعلیٰ پنجاب پرویز الہٰی، راسخ الہٰی اور زارا الہٰی کی درخواستوں پر آج سماعت کریں گے۔

درخواست میں مؤقف اختیار کیا گیا کہ پرویز الہٰی پر درج مقدمات کی عدالتوں سے ضمانتیں منظور ہو چکی ہیں، وہ 20 ستمبر سے 5 اکتوبر تک عمرہ کرنے اور برطانیہ جانا چاہتے ہیں۔

درخواست میں مؤقف اپنایا گیا کہ درخواست گزاروں کے نام پاسپورٹ کنٹرول لسٹ میں ہونے کے باعث بنیادی حقوق کی خلاف ورزی ہو رہی ہے۔

پرویز الہٰی کا نام ای سی ایل میں شامل کرنے کا اقدام ہائیکورٹ میں چیلنج

درخواست گزاروں نے استدعا کی ہے کہ عدالت پاسپورٹ کنٹرول لسٹ میں نام ڈالنے کے اقدام کو کالعدم قرار دے اور پاسپورٹ کنٹرول لسٹ سے ناموں کو نکالنے کا حکم دے۔

یاد رہے کہ لاہور ہائیکورٹ کے رجسٹرار آفس کی جانب سے اعتراض عائد کیا گیا تھا کہ درخواست میں وہی استدعا کی گئی ہے جو اس سے پہلے دائر درخواست میں کی گئی تھی۔