پنجاب کے ضلع رحیم یار خان سے تعلق رکھنے والے پاکستان تحریک انصاف کے رہنما اور قومی اسمبلی کے حلقہ 171 سے رکن اسمبلی ممتاز مصطفی انتقال کرگئے۔

پاکستان تحریک انصاف کے رکن قومی اسمبلی ممتاز مصطفیٰ پارلیمنٹ لاجز میں مقیم تھے جو ہارٹ اٹیک کی وجہ سے خالق حقیقی سے جا ملے۔

ممتاز مصطفیٰ کا تعلق رحیم یار خان سے تھا، وہ این اے 171 رحیم یار خان سے پی ٹی آئی کے ٹکٹ پر منتخب ہوئے تھے۔

اس حوالے سے اسپیکر قومی اسمبلی سردار ایاز صادق کو بھی آگاہ کردیا گیا جبکہ ایم این اے کے انتقال کی وجہ سے آج قومی اسمبلی اجلاس بغیر کاروائی ملتوی کیے جانے کا امکان ہے۔

ممتاز مصطفیٰ کچھ عرصہ قبل روڈ حادثے میں زخمی ہوئے تھے، وہ پنجاب بار کونسل کے وائس چیئرمین بھی رہ چکے ہیں۔

قومی اسمبلی میں اسپیکر، ڈپٹی اسپیکر قومی اسمبلی سمیت حکومت اور اپوزیشن بینچون سے تعلق رکھنے والے اراکین نے ممتاز مصطفیٰ کے انتقال پر گہرے دکھ اور افسوس کا اظہار کیا۔

اراکین نے ان کی سیاسی اور سماجی خدمات کو خراج تحسین پیش کیا اور ان کے درجات کی بلندی کے لیے دعا کی۔

ایاز صادق نے کہا کہ ممتاز مصطفیٰ کی اچانک موت کا سن کر دلی افسوس ہوا، انکی سیاسی و سماجی خدمات کو تادیر یاد رکھا جائے گا۔

اسپیکر قومی اسمبلی نے کہا کہ اللہ پاک سوگوار خاندان کو اس ناقابل تلافی نقصان کو برداشت کرنے کے لیے صبر جمیل عطا فرمائے۔