نارووال میں مبینہ چوری کے الزام پر فائرنگ سے خواتین سمیت 3 افراد جاں بحق ہوگئے۔

تفصیلات کے مطابق نارووال کے نواحی گاؤں رتیا خورد کے رہائشی فیض احمد پر مبینہ طور بکریاں چوری کا الزام تھا، گزشتہ روز بھی فیض احمد اور مقامی رہائشی افراد کے درمیان بکریوں کے چوری ہونے پر سخت تلخ کلامی ہوئی۔

آج دو مسلح افراد اچانک فیض احمد کے گھر میں داخل ہوئے اور جدید ہتھیار سے فائرنگ شروع کردی۔ فائرنگ کی زد میں آکر 60 سالہ فیض احمد ، 52 سالہ شمیم بی بی اور 45 سالہ حنیفاں بی بی شدید زخمی ہوگئے ۔

فائرنگ کے بعد ملزمان موقع سے فرار ہو گئے۔ شدید زخمی حنیفاں بی بی اور فیض احمد موقع پرہی جاں بحق ہو گئے جبکہ شمیم بی بی کو تشویشناک حالت میں ڈسٹرکٹ ہیڈ کوارٹرز ہسپتال نارووال میں منتقل کر دیا جہاں وہ زخموں کی تاب نہ لاتے ہوئے جاں بحق ہوگئی۔