پشاور کے نواحی علاقہ بڈھ بیر میں ملزمان نے گھر میں گھس کر فائرنگ کر دی جس کے نتیجے میں ایک ہی خاندان کے 9 افراد جاں بحق ہوگئے جن میں 4 خواتین اور 5 بچے شامل ہیں۔

ڈسٹرکٹ پولیس آفیسر بڈھ بیر کے مطابق فائرنگ کا واقعہ جائیداد کے تنازعہ کے باعث پیش آیا جس میں مخالف فریق نے گھر میں گھس کر فائرنگ کر دی۔

ڈی ایس پی بڈھ بیر کا کہنا ہے کہ واقعہ کے بعد پولیس نفری جائے وقوعہ پہنچ گئی ہے اور جاں بحق افراد کو پوسٹ مارٹم اور زخمیوں کو علاج کے لئے اسپتال منتقل کردیا گیا ہے۔

ایس ایس پی انوسٹی گیشن صاحبزادہ سجاد کا بیان

ایس ایس پی انوسٹی گیشن صاحبزادہ سجاد کا کہنا ہے کہ ملزموں کی گرفتاری کے لئے چار ٹیمیں تشکیل دیدی ہیں، متاثرہ افراد کی جانب سے ایف آئی آر درج کی جارہی ہے کرائم سین سے شوائد اکھٹے کرلئے گئے ہیں۔

دوسری جانب متاثرہ خاندان کے رشتہ دار صحافی خالد الرحمان نے واقعہ کی تصدیق کرتے ہوئے بتایا کہ یہ سانحہ پولیس کی غفلت کے باعث پیش آیا کیونکہ ان واقعہ کے دوران مسلسل ایک گھنٹہ پولیس کو کال کرتا رہا لیکن پولیس کی جانب سے کوئی جواب نہیں مل جس کی وجہ قیمتی جانوں کا ضیاع ہوگیا۔