ٹی ٹونٹی ورلڈ کپ کے چوتھے اور آخری گروپ میچ کی تیاری کے لیے ٹیم پاکستان فلوریڈا میں ہے۔ موسم کی خرابی کے باعث پریکٹس کا پہلا سیشن متاثر ہوا۔ کھلاڑیوں نے ہلکی پھلکی انڈور فزیکل ٹریننگ کی اور فٹ بال بھی کھیلی۔

سپر ایٹ مرحلے تک رسائی کے لیے اگر مگر کے چکر میں پھنسی ہوئی قومی کرکت ٹیم کے لیے اس میچ میں آئر لینڈ کے خلاف فتح لازم ہے اور ساتھ ہی ساتھ یہ بھی لازم ہے کہ آج کے میچ میں امریکا کو آئر لینڈ کے ہاتھوں شکست کا سامنا ہو۔

اگر یہ میچ بارش سے متاثر ہوا یعنی دونوں ٹیموں یعنی امریکا اور آئر لینڈ کو ایک ایک پوائنٹ ملا تو پاکستان ٹورنامنٹ سے باہر ہو جائے گا۔

فلوریڈا سے آج نیوز کے نمائندے عقیل احمد کی رپورٹ کے مطابق ٹی ٹونٹی ورلڈ کپ کے پہلے راؤنڈ کے آخری لیگ میچ کے لیے قومی کرکٹ ٹیم نے بارش کے باعث پریکٹس سیشن ختم کرکے اسٹیڈیم کی بجائے مقامی فٹبال کلب میں فزیکل ٹریننگ کی اور فٹبال کھیلنے کو ترجیح دی۔

قومی کرکٹرز نے بچوں کے ساتھ کرکٹ کلینک میں بھی حصہ لیا۔ کھلاڑیوں نے بچوں کے ساتھ کرکٹ کھیلی اور انہیں ٹپس بھی دیں۔

ٹی ٹونٹی ورلڈ کپ میں پاکستانی ٹیم اپنا آخری لیگ میچ 16 جون کو أئرلینڈ کے خلاف کھیلے گی۔ یہ میچ بھی بارش سے متاثر ہونے کا خدشہ ہے۔