بھارت کی ریاست مہاراشٹر میں ایک مسلم نوجوانوں کو شدید گرمی میں پانی مانگنے پر قتل کردیا گیا۔ یہ واقعہ ضلع ناندید کا ہے۔ 22 وسیم شیخ محبوب قریشی راج مستری کا کام کرتا تھا۔

گزشتہ روز اُس نے شدید گرمی کے دوران کام کرتے ہوئے جب اپنے انچارج مستری سے پینے کا پانی مانگا تو اُس نے مشتعل ہوکر درانتی سے اُس پر حملہ کردیا۔ 52 سالہ اُتم سنگھ نے وسیم شیخ کے سر اور پیٹ پر وار کیے۔

وسیم شیخ کو بچانے کی کوشش کرتے ہوئے ساتھ کام کرنے والی ایک خاتون زخمی ہوئی۔ بعد میں وسیم شیخ نے زخموں کی تاب نہ لاتے ہوئے دم توڑ دیا۔ اہلِ خانہ نے اہلِ علاقہ کے ساتھ مل کر لاش اسپتال سے نکال کر ایک پولیس اسٹیشن کے سامنے رکھ کر احتجاج کیا۔

وسیم شیخ کے اہلِ خانہ اور اہلِ علاقہ کے احتجاج پر پولیس نے اُتم سنگھ کو گرفتار کرلیا اور یقین دہانی کرائی کہ جرم ثابت ہونے پر اُسے قرار واقعی سزا دلائی جائے گی۔ بعد میں وسیم شیخ کی لاش کو پوسٹ مارٹم کے لیے اسپتال پہنچادیا گیا۔