خیبرپختونخوا حکومت نے سابق وزرائے اعلیٰ کا پروٹوکول ختم کردیا، اس حوالے سے محکمہ اسٹیبلشمنٹ نے اعلامیہ جاری کردیا۔

خیبرپختونخواحکومت نے سابق وزرائےاعلیٰ سے سیکرٹریز کی خدمات واپس لے لیں۔

یاد رہے کہ پی ٹی آئی حکومت نے سابق وزراء کا پروٹوکول ختم کرنے کا اعلان کیا تھا۔ جب کہ 8 مارچ کو کابینہ اجلاس میں سابق وزرائے اعلی کا پروٹوکول ختم کرنے کی منظوری بھی لی گئی تھی۔

سابق وزیر اعلیٰ حیدر خان ہوتی کے سیکرٹری خادم حسین کو اسٹیبلشمنٹ ڈیپارٹمنٹ رپورٹ کرنے کی ہدایت کردی گئی۔

پرویز خٹک کے سیکرٹری علی حسین قریشی کو محکمہ تعلیم رپورٹ کرنے کی ہدایت کی گئی۔

سابق وزیر اعلیٰ سردار مہتاب احمد خان کے سیکرٹری عبیداللہ سلیم کو اسٹیبلشمنٹ ڈیپارٹمنٹ میں تعنیات کر دیا۔

سابق وزیر اعلیٰ پیر صابر شاہ کے سیکرٹری سید حارث شاہ کو محکمہ آبپاشی رپورٹ کرنے کی ہدایت کردی گئی، جب کہ سابق وزیر اعلیٰ محمود خان کو نظر انداز کر دیا گیا۔