چارج سنبھالتے ہی ڈی جی ایس بی سی اے عبدالرشید سولنگی نے اپنی سرکاری گاڑی اور کرسی بیٹے کے حوالے کر دی ہے۔

سرکاری افسران کے اعلی عہدے پر تعیناتی کے بعد عبدالرشید سولنگی بیٹے کے مزے آگئے،اعلی سرکاری عہدے اورگاڑی، مراعات ٹک ٹاک بنانے کے لیے استعمال ہونےلگیں۔

ڈی جی کی کرسی پر بیٹھ کر بیٹا احکامات صادر فرماتارہا اور ویڈیو بھی بنواتا رہا۔ ویڈیو میں دیکھا جا سکتا ہے کہ عبدالرشید سولنگی کا بیٹا پرسکون انداز میں ٹھاٹھ باٹھ کے ساتھ احکامات جاری کر رہا ہے۔

ڈی جی ایس بی سی اے کا بیٹا سرکار کی جانب سے الاٹ سرکاری نمبر پلیٹ والی گاڑی پر پولیس لائٹ لگا کرویڈیو بناتا رہا۔ تمام ویڈیو سوشل میڈیا پر وائرل ہو گئیں۔

واضح رہے کہ سندھ بلڈنگ کنٹرول اتھارٹی میں 3 گھنٹے کے اندر دو ڈی جی ایس بی سی اے کو تبدیل کیا گیا تھا۔ پہلے یاسین شر بلوچ کو ڈی جی ایس بی سی اے تعیناتی کا نوٹی فکیشن جاری کیا گیا۔ لیکن تین گھنٹے بعد یاسین شر کی تعیناتی کا نوٹیفکیشن واپس لے کر نیا نوٹی فکیشن جاری کیا گیا.

نوٹیفکیشن کے مطابق اکیس گریڈ کے افسر عبدالرشید سولنگی کو نیا ڈی جی ایس بی سی اے تعینات کیا گیا تھا۔