وزیر اعلیٰ پنجاب مریم نواز نے خواتین کو ہراساں کرنا اپنی ریڈ لائن قرار دے دیا ہے، وہ خواتین کے عالمی دن کے موقع پر تقریب سے خطاب کر رہی تھیں۔

لاہور میں تقریب سے اظہار خیال میں ان کا کہنا تھا کہ گزشتہ10دنوں میں جو مسائل دیکھے اس پربات کرنا چاہتی ہوں، صرف آج کا دن ہی نہیں بلکہ ہردن خواتین کا دن ہوتا ہے، یہ سلسلہ یہاں نہیں رکنا چاہئے میرے بعد بھی خاتون وزیراعلیٰ بنے۔

مریم نواز کا مزید کہنا تھا کہ پابندیاں توڑکرآگے بڑھنے والی خواتین کو سلام پیش کرتی ہوں، ہم نے خواتین کیلئےسیفٹی ایپ متعارف کرائی ہے۔

خواتین کے مسائل سے متعلق وزیر اعلیٰ پنجاب کا کہنا تھا کہ مجھے اندازہ ہے خواتین کن کن مراحل سے گزر کر یہاں پہنچتی ہیں، مجھے بھی خود کو منوانے کے لیے 12 سال لگ گئے۔

افسوس زیادتی کے کیس روزکا معمول بن چکے ہیں، ہمارے نظام میں ابھی بہت سی خرابیاں ہیں۔

انہوں نے واضح کیا کہ خواتین کوہراساں کرنا میری ریڈ لائن ہے، ہم خواتین کو بلا سود قرضےدیں گے، میں خواتین کیلئےانٹرن شپ پروگرام شروع کرناچاہتی ہوں، خواتین کو بائیکس دینا چاہتی ہوں۔