لاہور ہائیکورٹ میں پی ایس ایل میچ میں فلسطین سے اظہار یکجہتی کے لیے بینرز کے ساتھ اسٹیڈیم میں داخلے پر پابندی کے خلاف دائر درخواست پر سماعت ہوئی جبکہ عدالت نے درخواست ناقابل سماعت قرار دیتے ہوئے خارج کر دی۔

لاہور ہائیکورٹ کے جسٹس عابد حسین چھٹہ نے محسن امیر بھٹی کی درخواست پر سماعت کی۔

درخواست گزار کی جانب سے ایڈوکیٹ عزت فاطمہ نے دلائل دیتے ہوئے مؤقف اختیار کیا کہ 26 فروری 2024 کو درخواست گزار قذافی اسٹیڈیم میں پی ایس ایل میچ دیکھنے گیا مگر اسے فلسطین سے اظہار یکجہتی کے لیے اٹھائے گئے بینر اور کپڑوں کی وجہ سے اسٹیڈیم داخل نہیں ہونے دیا گیا، سیکیورٹی حکام کا کہنا تھا آرڈر ہے کہ جب تک آپ قابل اعتراض چیزیں نہیں ہٹاتے داخل نہیں ہو سکتے، پی سی بی سمیت دیگر نے میری آذادی اظہار رائے کی خلاف ورزی کی ہے۔

درخواست میں استدعا کی گئی کہ عدالت پاکستان کرکٹ بورڈ سمیت دیگر کا اقدام غیر قانونی قرار دے اور فریقین کو نوٹس جاری کر کے روکا جائے کہ وہ پی ایس ایل میچز کے دوران ایسے کسی بھی عمل سے باز رہیں۔

بعدازاں لاہور ہائیکورٹ نے درخواست ناقابل سماعت قرار دیتے ہوئے خارج کردی ۔