فرانس نے یوکرین سے ایک دس سالہ معاہدہ کیا ہے جس کے تحت 3 ارب 23 کروڑ ڈالر سے زیادہ مالیت کا اسلحہ بھی فراہم کیا جائے گا اور یوکرین کی فوج کو جدید ترین طریقوں کے مطابق تربیت بھی دی جائے گی۔

یوکرین کے زیلینسکی نے اس معاہدے کے بعد فرانس کا شکریہ ادا کرتے ہوئے دیگر یورپی طاقتوںپر بھی زور دیا کہ وہ یوکرین کی مدد کے لیے آگے آئیں تاکہ روس کو مشرق کی سمت بڑھنے سے روکا جاسکے۔

یاد رہے کہ دو دن قبل جرمنی نے بھی یوکرین کی فوج کے لیے ایک بڑا امدادی پیکیج منظور کیا ہے۔ اس پیکیج کے تحت یوکرین کی فضائیہ کو مستحکم کیا جائے گا۔

فرانس کا امدادی پیکیج بنیادی طور پر یوکرین کی فوج کو توپ خانہ مستحکم کرنے کے لیے ہے۔ اس پیکیج کے ذریعے یوکرین کی پوزیشن کو استحکام ملے گا اور وہ خود کو نیٹو اور یورپی یونین کی رکنیت کے لیے بہتر طور پر تیار کرسکے گا۔

واضح رہے کہ یوکرین میں جاری جنگ کی حمایت سے گریز اور روس کی طرف جھکاؤ رکھنے پر یوکرین کے صدر زیلینسکی نے امریکا کے سابق صدر ڈونلڈ ٹرمپ کو یوکرین آکر جنگ کا مشاہدہ کرنے کی دعوت دی ہے۔

ایک بیان میں صدر زیلینسکی نے کہا کہ محاذِ جنگ کا مشاہدہ کرنے کے بعد ہی ٹرمپ کو اندازہ ہوگا کہ یوکرین کن مشکلات سے دوچار ہے۔

یہ بھی پڑھیں :

یوکرین کی صورتِ حال پر امریکا سے روسی صدر کا نیا مطالبہ کیا ہے؟

سعودی عرب یوکرین جنگ پر مذاکرات کی میزبانی کیلئے تیار

یوکرین جنگ میں شدت کے بعد گندم کی عالمی قیمت بڑھ گئی