اسلام آباد ہائیکورٹ نے وفاقی تحقیقاتی ایجنسی (ایف آئی اے) کو پاکستان تحریک انصاف کے سابق چیئرمین عمران خان کی بہن علیمہ خان کو ہراساں کرنے سے روک دیا، چیف جسٹس عامر فاروق نے حکم دیا کہ ایف آئی اے آج ہی علیمہ خان کے خلاف انکوائری یا شکایت کی تفصیلات فراہم کرے۔

اسلام آباد ہائیکورٹ کے چیف جسٹس عامر فاروق نے سابق وزیراعظم عمران خان کی بہن علیمہ خانم کو جاری ایف آئی اے سائبر کرائم اور انسداد دہشت گردی ونگ کے نوٹسز کے خلاف کیس کی سماعت کی۔

درخواست گزار علیمہ خان کے وکیل شیراز رانجھا نے کہا کہ ایف آئی اے کے پاس کوئی ایسا میٹیریل موجود نہیں جس سے سائبر کرائم ہوا ہو۔

وکیل صفائی نے استدعا کی کہ علیمہ خان کے خلاف جاری انکوائری یا شکایت کوخارج کیا جائے، جس پر چیف جسٹس عامر فاروق نے کہا کہ پہلے رپورٹ منگوا لیتے ہیں دیکھتے ہیں انکوائری ہے بھی یا صرف شکایت ہے۔

چیف جسٹس اسلام آباد ہائیکورٹ نے ریمارکس دیے کہ ایف آئی اے آج ہی علیمہ خان کے خلاف انکوائری یا شکایت کی تفصیلات فراہم کرے۔

دوران سماعت اسلام آباد ہائیکورٹ نے ریمارکس دیے کہ ایف آئی اے میں کوئی شکایت یا انکوئری ہے تو اس کی رپورٹ علیمہ خان کو فراہم کی جائے، ایف آئی اے علیمہ خان کے خلاف کوئی تادیبی کارروائی بھی نہ کرے۔

چیف جسٹس عامر فاروق نے علیمہ خان کے وکیل سے کہا کہ آپ کو رپورٹ کی کاپی مل جائے تو اپنا جواب ایف آئی اے کو جمع کروا دیں۔

بعدازاں عدالت نے ایف آئی اے کو علیمہ خان کے خلاف کسی بھی تادیبی کارروائی سے روکتے ہوئے کیس کی سماعت ملتوی کردی۔