لاہور ہائیکورٹ نے پاکستان تحریک انصاف (پی ٹی آئی) کے امیدواروں کو انتخابی مہم چلانے کی اجازت کے لیے درخواست پر وفاقی اور صوبائی حکومتوں سے 6 فروری کو جواب طلب کرلیا۔

لاہور ہائیکورٹ میں پی ٹی آئی کے امیدواروں کو انتخابی مہم چلانے کی اجازت کے لیے درخواست پر سماعت ہوئی، جسٹس شہرام سرور چوہدری نے زمان خان وردگ ایڈووکیٹ کی درخواست پر سماعت کی۔

درخواست گزار کی جانب سے مؤقف اختیار کیا گیا کہ عام انتخابات کے موقع پر پی ٹی آئی امیدواروں کو ناجائز تنگ اور ہراساں کیا جا رہا ہے، الیکشن مہم چلانے کی اجازت نہیں دی جا رہی۔

دخوست گزار نے استدعا کی گئی کہ عدالت امیدواروں کو ناجائز تنگ اور ہراساں کرنے سے روکے، لاہور ہائیکورٹ امیدواروں کو اس الیکشن مہم چلانے کی اجازت دے۔

عدالت نے معاملے پر وفاق اور صوبائی حکومتوں سے آئندہ سماعت پر جواب طلب کرلیا، سرکاری وکلاء نے جواب داخل کرانے کے لیے مہلت طلب کی۔

بعدازاں عدالت نے سرکاری وکلاء کی استدعا منظور کر لی اور جواب داخل کرانے کی مہلت دیتے ہوئے درخواست پر مزید سماعت 6 فروری تک ملتوی کر دی۔