لاہور کی انسداد دہشت گردی کی عدالت نے جناح ہاؤس حملہ کیس میں ملوث 7 اشتہاری ملزمان کی جائیدادیں قرق کرنے کا حکم دے دیا۔

لاہور میں انسدادِ دہشت گردی عدالت میں جناح ہاؤس جلاؤ گھیراؤ کے مقدمے میں بڑی پیشرفت ہوئی ہے۔

انسداد دہشت گردی عدالت کے جج محمد نوید 9 مئی کے واقعات میں ملوث اشتہاری ملزمان کی عدم گرفتاری پر فیصلہ سنادیا۔

عدالت نے پی ٹی آئی کے 7 اشتہاری ملزمان کی جائیدادیں قرق کرنے کا حکم دے دیا۔

عدالت کی جانب سے جاری ہونے والے حکم نامے میں ملزم میاں اسلم اقبال، حماد اظہر، مراد سعید، اعظم سواتی، حافظ فرحت اور علی امین گنڈا پور کی جائیدادیں ضبط کرنے کا حکم دیا گیا ہے۔

عدالت نے جائیداد کی ضبطی کا حکم نامہ پولیس کی درخواست پر جاری کیا ہے۔

درخواست میں پولیس نے مؤقف اختیار کیا تھا کہ ملزمان نے تفتیش میں شامل ہونے کی بجائے خود کو روپوش کر رکھا ہے، تمام ملزمان اشتہاری قرار دئیے جا چکے ہیں، ملزمان کی جائیدادوں کو قرق کیا جائے۔