پاکستان نے اپنی فضائی حدود کی خلاف ورزی کا جواب ایرانی صوبےسیستان میں دہشتگردوں کے ٹھکانوں پر بھرپور فوجی کارروائی ’آپریشن مرگ برسرمچار‘ سے دیا ہے۔

دفترخارجہ کے مطابق پاکستان نے سیستان میں دہشت گردوں کی مخصوص پناہ گاہوں کو نشانہ بنایا، اس فوجی کارروائی کے دوران متعدد دہشتگرد مارے گئے۔

پاکستان کی جانب سے اس آپریشن کا کوڈ نام ’ آپریشن مرگ برسرمچار’ رکھا گیا ہے۔

’مرگ بر‘ فارسی زبان کا لفظ ہے جس کے معنی ’مردہ باد، تباہی یا موت کا آنا‘ کے ہیں جب کہ سرمچار بلوچی لفظ ہے جس کا مطلب ’سر قربان کرنے والا یا جان نثار کرنے والا‘ ہے۔

دفترخارجہ کا کہنا ہے کہ پاکستان کئی سال سے ایران میں دہشت گردوں کی پناہ گاہوں پرتحفظات کااظہارکرتارہا ہے۔پاکستان نے دہشت گردوں جو خود کو سرمچار کہلاتے ہیں کی موجودگی سےمتعلق متعدد ڈوزیئربھی شیئرکیے۔

ترجمان دفتر خارجہ پاکستان کے مطابق مصدقہ انٹیلی جنس کی بنیادپرنام نہاد سرمچاروں کےخلاف کارروائی کی گئی ہے اور پاکستان اپنے عوام کے تحفظ،سلامتی کیلئے تمام ضروری اقدامات کرتا رہےگا۔